დავით ზილფიმიანი: სახეზეა, რომ ქვეყანაში მიმდინარეობს საბოტაჟი რადიკალური ოპოზიციის, პირველ რიგში, "ნაციონალური მოძრაობის" მხრიდან

რადიკალური ოპოზიციის და პირველ რიგში, „ნაციონალური მოძრაობის“ მხრიდან, ქვეყანაში მიმდინარეობს საბოტაჟი - ამის შესახებ „ევროპელი სოციალისტების“ ლიდერმა დავით ზილფიმიანმა ჟურნალისტებთან განაცხადა, რითაც სოზარ სუბარის დღევანდელ განცხადებას გამოეხმაურა იმის თაობაზე, რომ ნიკა მელია „ნაციონალური მოძრაობის“ ოფისში ჩაკეტვას გეგმავს.

ზილფიმიანს პროკურატურის არგუმენტები არასაკმარისად მიაჩნია ამიტომ, მელიასთვის სადეპუტატო იმუნიტეტის შეჩერებას მხარს არ უჭერს.

„დღეს ჩვენ ვსაუბრობთ გირაოს ნაწილის გადაუხდელობაზე, ეს არ არის საკმარისი არგუმენტი იმისთვის, რომ ჩვენ თანხმობა მივცეთ იმუნიტეტის მოხსნაზე. ეს სახეზეა, ის რომ ქვეყანაში მიმდინარეობს საბოტაჟი, ეს ჩემი სიტყვები არაა, ამას ლაპარაკობს სრულიად საერთაშორისო საზოგადოება. საბოტაჟი მიმდიანარეობს რადიკალური ოპოზიციის მხრიდან, მათ შორის "ნაციონალურო მოძრაობის" მხრიდან პირველ რიგში, მაგრამ თუ დავუბრუნდებით დღევანდელ საკითხს, ეს სულ სხვა მიმდინარეობაა, აქ უნდა შემოსულიყო გადაწყვეტილება სასამართლოსი ნიკანორ მელიას საკითხზე, რის გამოც საერთოდ აღიძრა საქმე და ეს იყო შეჭრის მცდელობა. სინამდვილეში შემოვიდა არა ეგ, არამედ გირაოს ნაწილობრივი გადახდის საკითხი, ამიტომ ეს არ არის ჩვენთვის საკმარისი“, - განაცხადა ზილფიმიანმა.

ცნობისათვის, სოზარ სუბარის განცხადებით, მმართველ გუნდს აქვს ინფორმაცია, რომ „სადეპუტატო იმუნიტეტის შეჩერების შემდეგ, თუკი სასამართლო აღკვეთის ღონისძიების გამკაცრების თაობაზე პროკურატურის შუამდგომლობას დააკმაყოფილებს, ნიკა მელია „ნაციონალური მოძრაობის“ ოფისში ჩაკეტვას და წინ სხვა ადამიანების აფარებას აპირებს“.

ნიკა მელიასთან დაკავშირებით, პროკურატურის შუამდგომლობას აღკვეთის ღონისძიებად პატიმრობის გამოყენებასთან დაკავშირებით, პარლამენტის კომიტეტებმა მხარი დაუჭირეს.

გენერალურმა პროკურატურამ ნიკა მელიასთვის აღკვეთის ღონისძიებად პატიმრობის გამოყენებასთან დაკავშირებით პარლამენტს მიმართა. მელიასთვის სადეპუტატო უფლებამოსილების შეჩერების საკითხი დღევანდელ სესიაზე გადის.

„ჯგუფური ძალადობის ხელმძღვანელობის და მასში მონაწილეობისთვის“ სისხლის სამართლის პასუხისგებაში მიცემულ ნიკა მელიას თბილისის საქალაქო სასამართლომ 2019 წლის 27 ივნისს აღკვეთის ღონისძიების სახით შეუფარდა 30 000-ლარიანი გირაო და დამატებით შემზღუდავი ღონისძიებები, მათ შორის, ელექტრონული მონიტორინგი. თუმცა, 2020 წლის პირველ ნოემბერს, საზოგადოებრივი თავშეყრის ადგილას საჯარო განცხადების გაკეთებისას, ნიკა მელიამ ელექტრონული მონიტორინგისთვის განკუთვნილი სამაჯური მოიხსნა.