ნიკა მელია: იმედია, მივუსხდებით მოლაპარაკების მაგიდას და ახალი არჩევნების ჩატარების საკითხს განვიხილავთ

„ქვეყანას კრიზისიდან ახალი ვადამდელი არჩევნები გამოიყვანს, ამიტომ იმედს ვიტოვებთ, რომ მივუსხდებით მოლაპარაკების მაგიდას და განვიხილოთ საკითხი ახალი არჩევნების ჩატარებასთან დაკავშირებით“, - ამის შესახებ „ნაციონალური მოძრაობის“ თავმჯდომარემ პარტიის ოფისში გამართულ ბრიფინგზე ოპოზიციის სახელით განაცხადა.

ნიკა მელიამ ფასილიტატორების მონაწილეობით მთავრობის წარმომადგენლებთან მოლაპარაკების განახლება მოითხოვა.

„ჩვენი ამოცანა არ არის ძალადობა, ჩვენი ამოცანა არ იქნება ვიღაცის დაჩაგვრა. ქვეყანა განვითარდება მხოლოდ თავისუფალი, სამართლიანი არჩევნების ჩატარებით“, - აღნიშნა ნიკა მელიამ.

მისივე თქმით, გიორგი გახარიამ აღიარა, რომ დღეს იგეგმებოდა სისხლისღვრა, რაც არ გააკეთა და ეს ნაბიჯი დასაფასებელია.

პრემიერ-მინისტრის გადადგომასთან დაკავშირებით, შსს-მ მელიას საქმეზე დაგეგმილი ღონისძიება გადადო.

გიორგი გახარიამ პრემიერ-მინისტრის თანამდებობა დატოვა.

„ნაციონალური მოძრაობის“ თავმჯდომარეს, ნიკა მელიას თბილისის საქალაქო სასამართლომ აღკვეთის ღონისძიებად პატიმრობა შეუფარდა.