ირაკლი ღარიბაშვილი: ხალხს უამრავი პრობლემა აქვს, ამას სჭირდება მოგვარება და არა ამ კრიმინალებთან დაჯდომა და რაღაც დიალოგი რიგგარეშე არჩევნებზე

წარმოგიდგენიათ, რაიმე გადატრიალება რომ მომხდარიყო, აქ რა მოხდებოდა ჩვენს ქვეყანაში? მოხდებოდა არეულობა, სამოქალაქო ომი, რაც პირდაპირ რუსეთის ინტერესებში შედის. რაც პირდაპირ ემთხვევა სააკაშვილის ინტერესებს, - ამის შესახებ ირაკლი ღარიბაშვილმა ფრაქცია „ქართული ოცნების“ დეპუტატების კითხვებზე პასუხისას განაცხადა. პრემიერ-მინისტრობის კანდიდატმა 2008 წელს, რუსეთთან ომის დროს მომხდარი ინციდენტიც გაიხსენა.

„ყველას კარგად გვახსოვს, რომ სააკაშვილი იყო ის სამარცხვინო პირი და მთავარსარდალი, პრეზიდენტი, რომელიც საფრანგეთის საგარეო საქმეთა მინისტრთან იმყოფებოდა გორში. თვითმფრინავის ხმის გაგონებაზე კაცი გაერტყა მიწაზე, გაიქცა, მიატოვა სტუმარი, რომელიც გაოგნებული იყურებოდა. და ამის შემდეგ ეს ადამიანი, გამოდის, ჯერ კიდევ ძალადობს თავისი გუნდის წევრებზე. ზოგს კომპრომატებით აშანტაჟებს, ზოგს ძალადობით, ზოგს ფულით იჭერს და ა.შ. მეგობრებო, ეს ქაოსი დასრულდება ძალიან მალე. ასე გაგრძელება არ შეიძლება.

ჩვენ უნდა მივხედოთ რეალური პრობლემების გადაწყვეტას. ხალხს უამრავი პრობლემა აქვს. ამას სჭირდება მოგვარება და არა ამ კრიმინალებთან დაჯდომა და რაღაც დიალოგი თურმე რიგგარეშე არჩევნებზე. რომელ არჩევნებზე გვესაუბრებიან საერთოდ? შევახსენებ ყველას, მათ შორის ჩვენს საერთაშორისო პარტნიორებს, როგორი არჩევნები ტარდებოდა საქართველოში 2012 წლის ჩათვლით. როგორი ტერორის ქვეშ უწევდათ ჩვენს მოქალაქეებს ხმის მიცემა. ეს ყველაფერი ხდებოდა სულ რაღაც 9 წლის წინ“, - განაცხადა ღარიბაშვილმა.