დიმიტრი ხუნდაძე: ასეთ მასკარადებზე იხარჯება დრო, ენერგია და მთავარი პრიორიტეტული საკითხები მიღმა რჩება

არ არის სადავო, რომ სამართლებრივ სახელმწიფოში კანონისა და სამართლის უზენაესობა არის მთავარი საყრდენი, რომ ქვეყანაში იყოს, როგორ პოლიტიკური, ასევე საზოგადოებრივი წესრიგი და სტაბილურობა. ეს არის არის აუცილებელი პირობა იმისა, რომ ქვეყანა წავიდეს წინ, - ამის შესახებ პარლამენტის ჯანმრთელობის კომიტეტის ხელმძღვანელმა, დიმიტრი ხუნდაძემ განაცხადა.

მისივე თქმით, ნიკა მელიას დაკავების სპეცოპერაციის დროს პრაქტიკულად არავინ დაშვებულა და პოლიციამ მაღალი პროფესიონალიზმი აჩვენა.

„ბევრი პრობლემაა ქვეყანაში დასაძლევი, ძალიან ბევრია სამუშაო. ასეთ მასკარადებზე იხარჯება დრო, ენერგია და მიღმა რჩება მთავარი პრიორიტეტული საკითხები. საკითხები, როგორიც არის მოსახლეობის ჯანმრთელობაზე ზრუნვა, ეკონომიკური საკითხები, სოციალური პრობლემები. ვფიქრობ, რომ კანონის აღსრულება ეს არის ვალდებულება ყველას მხრიდან და მისი არაღსრულება არის დიდი ხიფათის შემცველი. რა თქმა უნდა, სჯობდა ნიკანორ მელია დამორჩილებოდა კანონს ყოველგვარი წინააღმდეგობის გარეშე, მაგრამ მან ეს მოისურვა. ეს იყო მათი დესტრუქციული გეგმის ნაწილი, რომ უნდა შემდგარიყო აურზაური, რომელიც არ შედგა. პოლიციამ ძალიან მაღალი პროფესიონალიზმი აჩვენა. პრაქტიკულად არავინ დაზიანებულა, მცირედი ტრავმებია მხოლოდ და არიან ექიმების მეთვალყურეობის ქვეშ. არცერთის სიცოცხლეს არ ემუქრება საფრთხე და ვფიქრობ, დღეს უკვე გაეწერებიან ბინაზე“, - განაცხადა დიმიტრი ხუნდაძემ.

„ნაციონალური მოძრაობის“ თავმჯდომარე, ნიკა მელია დააკავეს.

ნიკა მელიას ედავებიან ჯგუფური ძალადობის ხელმძღვანელობას და მასში მონაწილეობას. საქმე ეხება 2019 წლის 20 ივნისს პარლამენტის შენობასთან განვითარებულ მოვლენებს. მაშინ აქციაზე ნიკა მელიამ იქ შეკრებილ ადამიანებს მიმართა, რომ მათი ადგილი პარლამენტს გარეთ არ იყო და ისინი პარლამენტის შენობაში უნდა ყოფილიყვნენ. ამის შემდეგ სიტუაცია დაიძაბა და იქ შეკრებილები სამართალდამცველებს დაუპირისპირდნენ.

2019 წლის 27 ივნისის განჩინებით, ნიკა მელიას აღკვეთის სახით 30000-ლარიანი გირაო შეეფარდა, მაშინ პარლამენტმა მას დეპუტატის იმუნიტეტი პირველად მოუხსნა და სასამართლოს განჩინება აღსრულდა. მან პირველ ჯერზე გადაიხადა 30000 ლარი, თუმცა მას შემდეგ რაც, 2020 წლის 1-ელ ნოემბერს პარლამენტთან აქციაზე ელექტრონული სამაჯური დემონსტრაციულად მოიხსნა, გენერალურმა პროკურატურამ კიდევ ერთხელ მიმართა სასამართლოს, რათა ნიკა მელიას გირაოს სახით 100 000 ლარი შეფარდებოდა, თუმცა სასამართლომ 40 000 ლარი განუსაზღვრა, რომელიც მან არ გადაიხადა.

ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა. მეორე დღეს, 18 თებერვალს, გიორგი გახარიამ პრემიერ-მინისტრის თანამდებობა დატოვა. ამასთან დაკავშირებით კი, შინაგან საქმეთა სამინისტრომ მელიას საქმეზე დაგეგმილი ღონისძიება დროებით გადადო.

22 თებერვალს, მეათე მოწვევის პარლამენტმა ირაკლი ღარიბაშვილის მთავრობას ნდობა გამოუცხადა.