სოზარ სუბარმა განმარტა კანონიერია თუ არა შენობაში წიწაკის სპრეის გამოყენება

რამდენიმე დღის წინ ვთქვი, რომ სახალხო დამცველი უნდა იყოს სამართლიანობისა და კანონის უზენაესობის ქურუმი და არა ცალკეული პარტიის მხარდამჭერი თუ მათი ადვოკატი. შესაბამისად, ადამიანის ციხიდან გამოსვლა - არგამოსვლა არ არის არც აღმასრულებელი ხელისუფლების, არც პარლამენტის, არც სახალხო დამცველის თემა. ეს არის მხოლოდ სასამართლოს გადასაწყვეტი, - ამის შესახებ სოზარ სუბარმა „დღის ქრონიკაში“ განაცხადა. უმრავლესობის წევრმა ასევე განმარტა რა შემთხვევაშია დასაშვები წიწაკის სპრეის გამოყენება „პოლიციის შესახებ“ კანონის მიხედვით.

„აქ წერია, რომ „ცრემლსადენი გაზის და წიწაკის გაზის გამოყენება შეიძლება დანაშაულის ან საზოგადოებრივად საშიში ქმედების ჩამდენი პირის დაკავებისას ან მისი იძულების მიზნით დატოვოს დაკავებული ტერიტორია ან შენობა-ნაგებობა, სადაც თავს აფარებს“. აქედან მკაფიოდ ჩანს, რომ ასეთი საშუალების გამოყენება შეიძლება დახურულ შენობაში, ეს ერთი. მეორე - საქართველოს კანონი აბსოლუტურ თანხვედრაშია ცივილიზებული ქვეყნების კანონმდებლობასთან და არ არის უფრო მკაცრი. და მესამე, მიუხედავად იმისა, რომ ეს არის კანონიერი და ეს არის შესაბამისობაში ცივილიზებული ქვეყნების კანონმდებლობასთან, დღეს გამოყენებული ეს საშუალება მინიმალური დოზით გამოიყენეს, მხოლოდ აუცილებლობის შემთხვევაში და შედეგიც არ იყო არანაირად კანონსაწინააღმდეგო“, - აღნიშნა სუბარმა.

სახალხო დამცველმა სამართალდამცავები ნიკა მელიას დაკავების დროს წიწაკის სპრეის გამოყენების გამო გააკრიტიკა.

დღეს „ნაციონალური მოძრაობის“ თავმჯდომარე, ნიკა მელია დააკავეს.