ეკა ბესელია: პრეზიდენტის შეთავაზება, სიმართლე გითხრათ, კარგად არ მესმის

“მუდმივად აქცენტის გაკეთება, რომ პრეზიდენტის სასახლე არის შეხვედრის ცენტრი, ან გარკვეული დისკუსიისა და ფორუმის ადგილი, ვფიქრობ, ამ პროცესს აკნინებს"- ასე გამოეხმაურა საპარლამენტო უმრავლესობის ერთ-ერთი ლიდერი ეკა ბესელია საქართველოს პრეზიდენტის შეთავაზებას, რომელიც ორშაბათიდან საკონსტიტუციო ცვლილებებთან დაკავშირებით დიალოგის დაწყებას გულისხმობს.

ბესელიას განცხადებით, კონსტიტუციის პროექტი პარლამენტში ორი მოსმენით უკვე მიღებულია და პროცესი საპარლამენტო ფორმატში გრძელდება. “პრეზიდენტის შეთავაზება, სიმართლე გითხრათ, კარგად არ მესმის. დასაწყისიდანვე მას ჰქონდა კომისიასთან აბსოლუტური მიუღებლობა. ის იყო სრულიად არათავსებადი ამ პროცესთან და უარყოფითად განწყობილი. შეხვედრა შეხვედრისთვის არ უნდა იყოს, ამ ყველაფერს უნდა ჰქონდეს გარკვეული შინაარსი და იყოს გათვლილი შედეგზე . მუდმივად აქცენტის გაკეთება, რომ პრეზიდენტის სასახლე არის შეხვედრის ცენტრი, ან გარკვეული დისკუსიის და ფორუმის ადგილი, მე ვფიქრობ, რომ ამ პროცესს აკნინებს. ეს პროცესი ჩვენ საპარლამენტო დისკუსიის ფორმატში გადმოგვაქვს და  ამ ფრომატში გავაგრძელებთ მუშაობას ეს იქნება სრულიად ლოგიკური"- განაცხადა ეკა ბესელიამ კახეთში, გაეროს ადამიანის უფლებათა უმაღლესი კომისრის ოფისის მიერ იურიდიულ საკითხთა კომიტეტის წარმომადგენლებისთვის ჩატარებული სამუშაო შეხვედრის შემდეგ.

იქვე საკითხზე კომენტარი უმრავლესობის კიდევ ერთმა წევრმა გააკეთა. გედევან ფოფხაძე ოპონეტებს მიმართავს და ამბობს, რომ კონსტიტუცია პოლიტიკური ვაჭრობის საგანი ვერ გახდება.

ბესელიას განცხადებამდე ერთადერთი დეპუტატი მმართველი გუნდიდან, ვინც პრეზიდენტის ადმინისტრაციის მორიგ წინადადებას გამოეხმაურა დიალოგის თაობაზე, ლევან კობერიძე იყო.

პრეზიდენტის ადმინისტრაცია კონსტიტუციასთან დაკავშირებით კონსესუსის მიღწევის მიზნით პოლიტიკურ პარტიებს შეხვედრას სთავაზობს. განცხადება ამის თაობაზე, პრეზიდენტის მრჩეველმა ფიქრია ჩიხრაძემ გააკეთა.

ბესელიამ imedinews-თან მცოცავ ანექსიასთან დაკავშირებითაც გამოთქვა აზრი. ის ამ საკითხის უშიშროების საბჭოს ფორმატში განხილვის აუცილებლობას  ვერ ხედავს. ეკა ბესელიას განცხადებით, საბჭო ფორმალური დისკუსიის სივრცეა და არ არის მსგავს საკითხებზე გადაწყვეტილებების მიმღები. იმ შემთხვევაში თუ საბჭო მსგავს შეთავაზებას მიიღებს ბესელიას აზრით, მას კონკრეტული შედეგი არ ექნება.

დეპუტატი წინა ხელისუფლების დროს დატოვებულ უმძიმეს მემკვიდრეობაზე საუბარობს და ამბობს, რომ ამ საკითხზე ხელისუფლება რეაგირებს და ებრძვის ისეთი მეთოდებით, რომელიც გაცილებით უფრო ეფექტური და შედეგის მომტანია.

ბორდერიზაციასთან დაკავშირებით უშიშროების საბჭოს საგანგებო სხდომის მოწვევაზე საქართველოს პრეზიდენტთან კონსულტაციები გუშინ დაიწყო.

რუსმა ოკუპანტებმა გორის მუნიციპალიტეტის სოფელ ბერშუეთში ე. წ. საზღვარი 4 ივლისს გადმოწიეს. ადგილობრივების თქმით, ე. წ. საზღვრის აღმნიშვნელი ბანერი გუშინ დადგეს. მათ დაახლოებით 10 ჰექტარი მიწის ნაკვეთი დაკარგეს.