პიტერ სტანო: ევროკავშირის მოწოდება მარტივია - მოლაპარაკება უნდა დაიწყოს და პროცესი საპარლამენტო დემოკრატიის პრინციპების თანახმად წარიმართოს

შარლ მიშელი ესტუმრა საქართველოს, რათა ადგილზე ენახა სიტუაცია. ის პირადად ჩაერთო მედიაციაში და საქართველოს კრიზისიდან გამოსასვლელად კონკრეტული და სპეციფიკური ნაბიჯები შესთავაზა. ევროკავშირის მოწოდება მარტივია. მოლაპარაკება უნდა დაიწყოს, პოლიტიკური ძალები ერთმანეთს უნდა ესაუბრონ, თქვენ უნდა იპოვოთ გამოსავალი, რაც არ უნდა პოლიტიკური უთანხმოება იყოს და ეს წარმართოთ საპარლამენტო დემოკრატიის პრინციპების თანახმად,- ამის შესახებ პიტერ სტანომ „ქრონიკასთან“ საუბრისას განაცხადა. ევროკომისიის მთავარი სპიკერი საგარეო საქმეთა და უსაფრთხოების საკითხებში აღნიშნავს, რომ ამიტომაც დანიშნა ევროპული საბჭოს პრეზიდენტმა სპეციალური წარმომადგენელი.

„შარლ მიშელის სპეციალური წარმომადგენელი შეეცდება დაეხმაროს პოლიტიკურ პარტიებს გადალახონ ეს კრიზისი. ის არის კრისტიან დანიელსონი. ის იყო ევროკავშირის სამეზობლოს დირექტორატის გენერალური დირექტორი. მან იცის საქართველო. დანიელსონი ევროკავშირის წარმომადგენლობას ხელმძღვანელობს შვედეთში. ის ჩამოვა სხვა გარემოდან. ეს იქნება ახალი სახე, რომელიც ამ პროცესში აქამდე ჩართული არ ყოფილა, თუმცა საქართველო და ძირითადი აქტორები ძალიან კარგად იცის. ის მჭიდროდ იმუშავებს კარლ ჰარცელთან, რომელიც აქტიურად არის ჩართული პროცესში და ისინი გაერთიანებული ძალებით იმუშავებენ“, - განაცხადა სტანომ.

მისივე თქმით, მედიაციის პროცესში ევროპული საბჭოს პრეზიდენტის, შარლ მიშელის ჩართვა იმის დემონსტრირებაა თუ როგორ ზრუნავს ევროკავშირი საქართველოზე.