ნიკოლოზ სამხარაძე: ველით, რომ კრისტიან დანიელსონი ოპოზიციას პარლამენტში შესვლისკენ მოუწოდებს

პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძე აცხადებს, რომ მმართველი გუნდი მზად არის კომპრომისული ნაბიჯების გადადგმისკენ, ოღონდ ამისთვის ოპოზიციის მზადყოფნაც არის აუცილებელი.

„როდესაც კრისტიან დანიელსონი ჩამოვა, რომელიც დანიშნეს მედიატორად ხელისუფლებასა და ოპოზიციას შორის, ველით რომ მისი მხრიდან იქნება კონკრეტული მოწოდებები ოპოზიციის მისამართით, რომ მათ გაითვალისწინონ სამართლის უზენაესობა, საზოგადოების მიერ გაკეთებული არჩევანი, პატივი სცენ ინსტიტუტებს და შემოვიდნენ პარლამენტში. რაც შეეხება სხვა საკითხებს, ჩვენ მზად ვართ, ვისაუბროთ ნებისმიერ თემაზე - იქნება ეს საარჩევნო რეფორმა, სასამართლო რეფორმა თუ ადგილობრივი არჩევნებისთვის მზადების საკითხები. ჩვენ ვიქნებით კონსტრუქციულები, მზად ვართ კომპრომისული ნაბიჯების გადადგმისკენ, ოღონდ უნდა დავინახოთ, რომ ოპოზიციაც არის ამისთვის მზად“, - განაცხადა სამხარაძემ.

საქართველოში ვიზიტის ფარგლებში, ევროპული საბჭოს პრეზიდენტი შარლ მიშელი ხელისუფლებისა და ოპოზიციის წარმომადგენლებს შეხვდა და მხარეებს შეთანხმებისკენ მოუწოდა. მოგვიანებით შარლ მიშელმა ევროკავშირის უმაღლეს წარმომადგენელ ჟოზეპ ბორელთან შეთანხმებით საქართველოში პოლიტიკური დიალოგის მედიაციისთვის თავის წარმომადგენლად კრისტიან დანიელსონი დანიშნა.

ევროპარლამენტში საქართველოს საკითხზე გამართული დებატების დროს, უსაფრთხოებისა და საგარეო პოლიტიკის საკითხებში ევროკავშირის უმაღლესმა წარმომადგენელმა ჟოზეპ ბორელმა განაცხადა: მედიაციის იმ ძალისხმევით, რომელიც შარლ მიშელმა წამოიწყო, მზად ვიქნებით საქართველოს პოლიტიკური შეთანხმების მიღწევაში დავეხმაროთ.