ნიკოლოზ სამხარაძე: პარლამენტში გადაწყვეტილების მიღებას სჭირდება მინიმუმ 76 ხმა - რა შედეგებიც არ უნდა დადოს ალტერნატიულმა სამუშაო ჯგუფმა, ამდენი ხმა მათ არ უგროვდებათ

საკმაოდ კომედიური სურათი შეიქმნა: რამდენიმე ოპოზიციური პარტია, რომელთა ჯამური რაოდენობაც პარლამენტში ვერ აღწევს მთლიანი პარლამენტის ერთ მესამედს, იწყებს სამუშაო პროცესს, რომელიც უნდა დასრულდეს კანონების მიღებით, ისე, რომ მათ არ აქვთ კონსულტაციები დანარჩენ 5 პარტიასთან. ეს არის ცირკი, - ამის შესახებ პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ „ქრონიკის“ ეთერში განაცხადა.

„ამ პარტიებმა 2020 წლის არჩევნების შემდეგ ბოიკოტი გამოუცხადეს პარლამენტს და 6 თვის განმავლობაში არ შემოდიოდნენ სხდომებზე. ახლა იგივე 3 პარტია იგივე მეთოდებით ცდილობს, პარლამენტში მიმდინარე პროცესის საბოტაჟი მოახდინოს. ამ დროს 5 პარტია და არასამთავრობო სექტორი ჩართულია რეკომენდაციების შემუშავებაში. ამ 3 პარტიას არ სურთ, საქართველომ მიიღოს კანდიდატის სტატუსი. ისინი ყველანაირად უშლიან ხელს ამას. პარლამენტში გადაწყვეტილების მიღებას სჭირდება მინიმუმ 76 ხმა. რა სასწაულებრივი შედეგებიც არ უნდა დადოს მათმა სამუშაო ჯგუფმა, ამდენი ხმა მათ არ უგროვდებათ. შესაბამისად, თუ რაიმე შედეგის მიღწევა სურთ, ეს შედეგი მიიღწევა დანარჩენ 5 პარტიასთან თანამშრომლობით“, - აცხადებს სამხარაძე.

ევროპული რეკომენდაციების შესასრულებლად, პარლამენტში აქტიური მუშაობა მიმდინარეობს. დღეს, შალვა პაპუაშვილის ხელმძღვანელობით, საკანონმდებლო ორგანოში სასამართლო რეფორმის სამუშაო ჯგუფის მეორე შეხვედრა გაიმართება, განიხილავენ „ქართული ოცნებისა“ და „მოქალაქეების“ მიერ მომზადებულ ორ დოკუმენტს. შეხვედრაში, საპარლამენტო უმრავლესობასთან ერთად, „გირჩის“, „მოქალაქეების“, „საქართველოსთვის“ და „ევროპელი სოციალისტების“ წევრები მიიღებენ მონაწილეობას. 12 რეკომენდაციის შესრულების ვალდებულება საქართველოს წლის ბოლომდე აქვს.