სოზარ სუბარი: კრისტიან დანიელსონის დანიშვნამ ყოველგვარი საფუძველი გამოაცალა სპეკულაციებს

კრისტიან დანიელსონის დანიშვნამ ყოველგვარი საფუძველი გამოაცალა სპეკულაციებს და იმედია, რომ ცოტა უფრო სერიოზულად მოეკიდებიან ამგვარ მედიაციასაც, საკუთარ წინადადებებსაც და მიიღებენ მონაწილეობას ამ მართლაც უმნიშვნელოვანეს პროცესში, რომელიც უბრალოდ სტაბილურობას მოუტანს ჩვენს ქვეყანას, - ამის შესახებ პარლამენტის რეგიონული პოლიტიკისა და თვითმმართველობის კომიტეტის თავმჯდომარემ, სოზარ სუბარმა „დღის ქრონიკაში“ განაცხადა.

მისი თქმით, საარჩევნო რეფორმაში ოპოზიციისა და არასამთავრობო ორგანიზაციების წინადადებების აბსოლუტური უმრავლესობა ასახულია.

„ოპოზიცია შემოვიდა პარლამენტში და მათი წინადადებები სრულად იქნა გათვალისწინებული საარჩევნო რეფორმაში. ოპოზიციასთან ერთად აქ ჩართული არიან არასამთავრობო ორგანიზაციების წარმომადგენლები და მიუხედავად იმისა, რომ მე არ ვარ ამ ჯგუფის წევრი, როგორც ვიცი, მათი წინადადებების აბსოლუტური უმრავლესობა სრულად არის გათვალისწინებული. სხვათა შორის, საპარლამენტო უმრავლესობის წინადადებები წარმოადგენს იმ წინადადებებს, რაც შემუშავებული იყო საპარლამენტო ერთობაში და რატომღაც ოპოზიციური ერთობის გარეთ დარჩენილი ნაწილი დღეს საკუთარ წინადადებებს ემიჯნება, რაც გაუგებარია. რაც შეეხება დიალოგს, ჩვენ დიალოგის მზადყოფნა ყოველთვის გვქონდა და გვაქვს კიდეც. რამდენიმე დღეა ჩვენ ვისმენთ სრულიად უპასუხისმგებლო განცხადებებს, რომ დასრულდა დიალოგი, რომ ისინი არავითარ შემთხვევაში ნარ წამოვლენ დიალოგზე ვიდრე ვიღაც ციხიდან არ გამოვა, სანამ ღარიბაშვილი არ გადადგება თანამდებობიდან, სანამ მთავრობა არ გადადგება და არ გამოცხადდება ვადამდელი არჩევნების ჩატარების საკითხი, თუმცა კრისტიან დანიელსონის დანიშვნამ ყოველგვარი საფუძველი გამოაცალა სპეკულაციებს და იმედია, რომ ცოტა უფრო სერიოზულად მოეკიდებიან ამგვარ მედიაციასაც, საკუთარ წინადადებებსაც და მიიღებენ მონაწილეობას ამ მართლაც უმნიშვნელოვანეს პროცესში, რომელიც უბრალოდ სტაბილურობას მოუტანს ჩვენს ქვეყანას“, - განაცხადა სოზარ სუბარმა.

ევროპარლამენტში საქართველოს საკითხზე გამართული დებატების დროს, უსაფრთხოებისა და საგარეო პოლიტიკის საკითხებში ევროკავშირის უმაღლესმა წარმომადგენელმა ჟოზეპ ბორელმა განაცხადა: მედიაციის იმ ძალისხმევით, რომელიც შარლ მიშელმა წამოიწყო, მზად ვიქნებით საქართველოს პოლიტიკური შეთანხმების მიღწევაში დავეხმაროთ.

საქართველოში ვიზიტის ფარგლებში, ევროპული საბჭოს პრეზიდენტი შარლ მიშელი ხელისუფლებისა და ოპოზიციის წარმომადგენლებს შეხვდა და მხარეებს შეთანხმებისკენ მოუწოდა. მოგვიანებით შარლ მიშელმა ევროკავშირის უმაღლეს წარმომადგენელ ჟოზეპ ბორელთან შეთანხმებით საქართველოში პოლიტიკური დიალოგის მედიაციისთვის თავის წარმომადგენლად კრისტიან დანიელსონი დანიშნა.