სერგო ჩიხლაძე: ფრთხილ ოპტიმიზმს გამოვთქვამ, რომ მოლაპარაკებები საკმაოდ წარმატებული იქნება

უახლოესი ორი-სამი დღე ნამდვილად გადამწყვეტი იქნება მოლაპარაკებებში, „სტრატეგია აღმაშენებელი“ დიდ იმედებს ვამყარებთ, – ამის შესახებ „სტრატეგია აღმაშენებლის“ წევრმა, სერგო ჩიხლაძემ ევროპული საბჭოს პრეზიდენტის სპეციალური წარმომადგენლის, კრისტიან დანიელსონის საქართველოში ვიზიტთან დაკავშირებით განაცხადა.

მისი თქმით, ელოდებოდნენ კიდეც შარლ მიშელის წარმომადგენლის ჩამოსვლას, ეს არ იყო მოულოდნელობა, რადგან მოდერატორის როლი იკისრა ევროკავშირის პრეზიდენტმა.

„ძალიან მნიშვნელოვანი შეხვედრისთვის ვემზადებით. უახლოესი ორი-სამი დღე ნამდვილად გადამწყვეტი იქნება მოლაპარაკებებში. ევროკავშირის წარმომადგენელი ჩამოდის. ჩვენ, „სტრატეგია აღმაშენებელი“ დიდ იმედებს ვამყარებთ ამ მოლაპარაკებებზე და ფრთხილ ოპტიმიზმსაც გამოვთქვამ, რომ მოლაპარაკებები საკმაოდ წარმატებული იქნება. დიდი იმედი მაქვს, რომ 16 მარტს საქართველოდან ბრიუსელში ჩასული დელეგაცია საკმაოდ საინტერესო მონახაზს წაიღებს ექვსივე პუნქტზე, რომელიც ჯერ კიდევ ბატონმა შარლ მიშელმა წინა კვირაში განსაზღვრა. ველოდით კიდეც შარლ მიშელის წარმომადგენლის ჩამოსვლას, ეს არ იყო მოულოდნელობა, იმიტომ, რომ მოდერატორის როლი იკისრა ევროკავშირის პრეზიდენტმა. ეს ძალიან მნიშვნელოვანია, განსაკუთრებით იმ მომენტში, როდესაც „ქართული ოცნებისგან“ მაინც ვხედავთ მცდელობებს, რომ როგორღაც გაწელოს ეს პროცესი. უშუალოდ წარმომადგენელი ჩამოდის, რომელთან შეხვედრაზე „ქართული ოცნება“ უარს ვერ იტყვის. ეს იქნება გადამწყვეტი შეხვედრა ან შეხვედრები, რომელიც დაგვანახებს შეთანხმებისკენ მივდივართ თუ ისევ ჩიხისკენ“, - განაცხადა სერგო ჩიხლაძემ.

ევროპარლამენტში საქართველოს საკითხზე გამართული დებატების დროს, უსაფრთხოებისა და საგარეო პოლიტიკის საკითხებში ევროკავშირის უმაღლესმა წარმომადგენელმა ჟოზეპ ბორელმა განაცხადა: მედიაციის იმ ძალისხმევით, რომელიც შარლ მიშელმა წამოიწყო, მზად ვიქნებით საქართველოს პოლიტიკური შეთანხმების მიღწევაში დავეხმაროთ.

საქართველოში ვიზიტის ფარგლებში, ევროპული საბჭოს პრეზიდენტი შარლ მიშელი ხელისუფლებისა და ოპოზიციის წარმომადგენლებს შეხვდა და მხარეებს შეთანხმებისკენ მოუწოდა. მოგვიანებით შარლ მიშელმა ევროკავშირის უმაღლეს წარმომადგენელ ჟოზეპ ბორელთან შეთანხმებით საქართველოში პოლიტიკური დიალოგის მედიაციისთვის თავის წარმომადგენლად კრისტიან დანიელსონი დანიშნა.