გიორგი ვაშაძე: პროგრესი ნამდვილად არის განხილვებში, მაგრამ ჯერ არ არის ის ნიშნული, რაზეც შეთანხმება შეიძლება

„პროგრესი ნამდვილად არის განხილვებში, მაგრამ ჯერ არ არის ეს ის ნიშნული, რაზეც შეთანხმება შეიძლება, რომ შედგეს“, - ამის შესახებ ჟურნალისტებს „სტრატეგია აღმაშენებლის“ ლიდერმა განუცხადა მას შემდეგ, რაც ოპოზიციის წევრები ევროპული საბჭოს პრეზიდენტის წარმომადგენელს, კრისტიან დანიელსონს შეხვდნენ.

გიორგი ვაშაძის თქმით, გარკვეული პროგრესის არსებობა მას პოზიტიურად განაწყობს.

„დღის ბოლომდე კიდევ იქნება შეხვედრა, რაღაც საკითხები დაზუსტდება და შესაძლოა, მხარეების პოზიცია კიდევ დაახლოვდეს. ყველას უნდა გვქონდეს რაციონალური პოზიცია, მაგრამ იმედი მაქვს, რომ დღის ბოლომდე, იმ საკითხებზე, რაც დარჩა, ვიხილავთ რაღაც ახალ პოზიციებს „ქართული ოცნების“ მხრიდან. ასევე ხაზი მინდა გავუსვა - დოკუმენტზე, რომელზეც ვმუშაობდით, ეს არის არა მხარეების დოკუმენტი, არამედ ევროკავშირის და აშშ-ის მიერ დადებული საბაზისო დოკუმენტი, რის გარშემოც მიდის მუშაობა“, - აღნიშნა გიორგი ვაშაძემ.

მისივე თქმით, განიხილება ყველა საკითხი, ექვსივე პუნქტი, მათ შორის „პოლიტპატიმრების და რიგგარეშე არჩევნების თემაც და ის თუ როგორ უნდა მივიდეთ რიგგარეშე არჩევნებამდე“.

„კონკრეტულ შინაარსს ვერ გეტყვით, თუმცა სამი ალტერნატივაც კი ვთქვით სხვადასხვა ვარიაციის, თარიღის და წინაპირობის, მაგრამ ველოდებით ამ საკითხებზე მათი მხრიდან პასუხს“, - აღნიშნა გიორგი ვაშაძემ.

ოპოზიციასთან შეხვედრამდე, კრისტიან დანიელსონი მმართველი გუნდის წარმომადგენლებს შეხვდა. მოლაპარაკებები სავარაუდოდ დღეს გაგრძელდება. ევროპელი დიპლომატი საქართველოში 12 მარტს ჩამოვიდა.