როგორ აფასებს ოპოზიცია „ოჯახური ღირებულებებისა და არასრულწლოვანთა დაცვის შესახებ“ საკონსტიტუციო ცვლილებებთან დაკავშირებით „ქართული ოცნების“ კანონების პაკეტს

ივანიშვილს რომ ადარდებდეს და აღელვებდეს საქართველოს კონსტიტუცია, უპირველეს ყოვლისა დაიცავდა ქვეყნის კონსტიტუციის 78-ე მუხლს. მას სურს მხოლოდ და მხოლოდ ძალაუფლების შენარჩუნება, მათ შორის გამოგონილი ფსევდო თემების პედალირებით და ადამიანებისთვის თავზე მოხვევით, - ასე აფასებს „ნაციონალური მოძრაობის“ წევრი თინა ბოკუჩავა „ოჯახური ღირებულებებისა და არასრულწლოვანთა დაცვის შესახებ“ საკონსტიტუციო ცვლილებებთან დაკავშირებით „ქართული ოცნების“ კანონების პაკეტს.

ინიციატივა შეაფასა „სტრატეგია აღმაშენებლის“ წევრმა პაატა მანჯგალაძემაც და აღნიშნა რომ ქრისტიანულ სახელმწიფოში სიწმინდის დაცვა კანონმდებლობით საჭირო არ არის.

„ორიათასწლოვან ქრისტიანულ ქვეყანაში კანონპროექტით დავიცავთ ოჯახურ სიწმინდეს - ასე არ ვფიქრობ. მართალი ცხოვრების წესით და პროპაგანდით შეიძლება. ახალგაზრდები გადიან და ტოვებენ საქართველოს, დასაქორწინებელიც არ დარჩება არავინ. ბუნებრივად გამოვა, რომ ვიცავთ სიწმინდეს, მაგრამ ოჯახები არ შეიქმნება საქართველოში“, - აღნიშნა მანჯგალაძემ.

პარტიაში „საქართველოსთვის“ კი ამბობენ, რომ პოზიციას კანონპროექტის შესახებ მისი გაცნობის შემდეგ შეაფასებენ.

„ჯერ არ გვინახავს ეს კონკრეტული კანონპროექტები, ვნახავთ. იქ ადრე ჩამოთვლილ 7 პუნქტში ორი საკითხი იყო კრიტიკული და პრობლემური, უფლებების ნაწილში გამიჯვნის პრობლემის თვალსაზრისით. თუ ვინმეს აინტერესებს ეს პოზიციები, საერთოდ არ არის საჩქარო. ვნახავთ და ამის შემდეგ მივუბრუნდებით ამ საკითხს“, - აღნიშნა პარტია „საქართველოსთვის“ წევრმა ბექა ლილუაშვილმა.

საპარლამენტო უმრავლესობამ დღეს დააინიცირა კანონების პაკეტი „ოჯახური ღირებულებებისა და არასრულწლოვანთა დაცვის შესახებ“, რომელიც შედგება ერთი ძირითადი კანონპროექტისგან და 18 გამომდინარე კანონპროექტისგან, რომლითაც ცვლილებები შედის სხვადასხვა კანონში“.

• ცვლილებების შემდეგ დაუშვებელი იქნება ქორწინების ალტერნატიული კავშირის რეგისტრირება, რომელიც საქართველოს კანონმდებლობით დადგენილ პირობას ეწინააღმდეგება, ანუ არ იქნება კავშირი ქალსა და მამაკაცს შორის;
• დაუშვებელი იქნება იმ ადამიანების მიერ არასრულწლოვანის შვილად აყვანა, რომელიც თავის თავს თავისი სქესისგან განსხვავებულ სქესს მიაკუთვნებენ ან არ არიან ჰეტეროსექსუალი ადამიანები;
• აკრძალული იქნება პირისთვის სქესის შეცვლის მიზნით ქირურგიული ოპერაციის ჩატარება ან სხვა სახის მანიპულაციის გამოყენება;
• სახელმწიფოს მიერ გაცემულ დოკუმენტებში სქესის მითითების საკითხში, აკრძალული იქნება პირადობის დამადასტურებელ დოკუმენტებში ან სახელმწიფოს მიერ გაცემულ სხვა დოკუმენტში ადამიანის სქესისგან განსხვავებული სქესის მითითება;
• დაუშვებელი იქნება საგანმანათლებლო დაწესებულებაში ლგბტ პროპაგანდის წარმოება;
• დაუშვებელი იქნება მაუწყებლის მიერ თავისი ეთერით ისეთი ინფორმაციის გავრცელება, რომელიც მიმართულია თავისი სქესისგან განსხვავებული სქესისთვის მიკუთვნების, ერთი და იმავე სქესის წარმომადგენლებს შორის ურთიერთობის ან ინცესტის პოპულარიზაციისკენ;
• დაუშვებელი იქნება საჯარო შეკრება ან მანიფესტაცია, რომელიც მიმართულია ადამიანის თავისგან განსხვავებული სქესისთვის მიკუთვნების, ერთი და იმავე სქესის სქესის წარმომადგენლებს შორის ურთიერთობის ან ინცესტის პოპულარიზაციისკენ;
• შრომით ურთიერთობებში როგორც კერძო, ისე საჯარო დაწესებულებებში ბათილი იქნება შრომითი ურთიერთობების ფარგლებში დაკისრებული ისეთი ვალდებულება, რომელიც მიმართულია ბიოლოგიური სქესის უგულებელყოფისკენ.