ეკატერინე ტიკარაძე: C ჰეპატიტის დიაგნოსტიკასა და მკურნალობაზე საყოველთაო წვდომამ საქართველო მსოფლიოს მასშტაბით მისაბაძი ქვეყანა გახადა

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსა და დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ, აშშ-ის დაავადებათა კონტროლისა და პრევენციის ცენტრებთან თანამშრომლობით, ვირტუალურ ფორმატში C ჰეპატიტის ელიმინაციის პროგრამის ტექნიკურ მრჩეველთა ჯგუფის მე-6 შეხვედრა გაიმართა. შეხვედრა CDC-ის ვირუსული ჰეპატიტების განყოფილების ხელმძღვანელმა, კაროლინ ვესტერიმ და ეკატერინე ტიკარაძემ გახსნეს.

მინისტრის განცხადებით, საქართველოში C ჰეპატიტის დიაგნოსტიკასა და მკურნალობაზე საყოველთაო წვდომამ ქვეყანაში მნიშვნელოვნად შეამცირა დაავადების ტვირთი და საქართველო მსოფლიოს მასშტაბით მისაბაძი ქვეყანა გახდა.

შეხვედრის მიზანი პროგრამის მიმდინარე მიღწევებისა და არსებული გამოწვევების ანალიზია, რომლის საფუძველზეც სამომავლო სამოქმედო რეკომენდაციები ჩამოყალიბდება და 2021-2025 წლების ელიმინაციის სტრატეგიის სამუშაო ვერსია განიხილება.

„მოგეხსენებათ, რომ C ჰეპატიტის ელიმინაციის პროგრამა საკმაოდ წარმატებულია, რომელმაც სერიოზული პროგრესი განიცადა ამ წლების განმავლობაში და ქვეყნის მოსახლეობას მნიშვნელოვანი დახმარება გაუწია ამ დაავადებასთან ბრძოლაში. C ჰეპატიტის სკრინინგი ჩატარებული აქვს მოზრდილი მოსახლეობის 72%-ზე მეტს. მკურნალობის პროგრამაში ჩაერთო 73 ათასზე მეტი პაციენტი, განკურნების მაჩვენებელი კი 98.9%-ს შეადგენს. საქართველოში C ჰეპატიტის დიაგნოსტიკასა და მკურნალობაზე საყოველთაო წვდომამ ქვეყანაში მნიშვნელოვნად შეამცირა დაავადების ტვირთი და საქართველო მსოფლიოს მასშტაბით გახდა მისაბაძი ქვეყანა. მსურს, კიდევ ერთხელ ხაზი გავუსვა მათ მხარდაჭერას და კიდევ ერთხელ მადლობა მოვახსენო ყველა იმ ორგანიზაციასა და თითოეულ ადამიანს, ვინც ამ წლების განმავლობაში დაუღალავად შრომობს ჩვენთან ერთად. მსოფლიოში შექმნილი ვითარების ფონზე, დღეს TAG-ის შეხვედრა ვირტუალურ ფორმატში ტარდება. მიუხედავად ამისა, დარწმუნებული ვარ, რომ ეს შეხვედრა ისეთივე წარმატებული იქნება, როგორც აქამდე, და კიდევ ერთი წინ გადადგმული ნაბიჯი გახდება საქართველოს მოსახლეობის ჯანმრთელობის გაუმჯობესების გზაზე“, - განაცხადა ეკატერინე ტიკარაძემ.

საერთაშორისო ექსპერტებისგან შემდგარი ტექნიკურ მრჩეველთა ჯგუფი 2016 წელს ჩამოყალიბდა, აშშ-ის დაავადებათა კონტროლის, პრევენციის ცენტრებისა და ჯანმრთელობის მსოფლიო ორგანიზაციისა მხარდაჭერით. მას შემდეგ, ჯგუფი ყოველწლიურად იკრიბება და განიხილავს C ჰეპატიტის ელიმინაციისკენ მიმართულ პროგრესს, არსებულ გამოწვევებსა და მათი გადაჭრის გზებს.

შეხვედრაში ასევე მონაწილეობდნენ აშშ-ის ელჩი საქართველოში კელი დეგნანი, კომპანიის „Gilead Sciences” ვიცე-პრეზიდენტი და დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორი ამირან გამყრელიძე.