ირაკლი კობახიძე: ოპოზიციის ლიდერებში არიან დამნაშავეები და ვერც ერთი მათგანი ვერ ბედავს სტრასბურგში გასაჩივრებას

„ნაციონალური მოძრაობის“ ლიდერი, მიხეილ სააკაშვილი არის აღიარებული კრიმინალი რამდენიმე დანაშაულებრივ ეპიზოდზე, - ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

მისი თქმით, საქართველოში პოლიტპატიმრები არ არსებობენ და ოპოზიციის ლიდერებში დამნაშავეები არიან.

„უდანაშაულობის პრეზუმპცია რომ არ დავარღვიო, დავიწყებ სააკაშვილით, რომლის მიმართაც არის რამდენიმე განაჩენი და ის ემალება გამოძიებას. ეს პირველი, რომელიც არის „ნაციონალური მოძრაობის“ ლიდერი, აღიარებული კრიმინალი რამდენიმე დანაშაულებრივ ეპიზოდზე. ნიკანორ მელია, რომელსაც აქვს ასევე მსჯავრი კონკრეტულ დანაშაულზე. ის აკოტრებდა კერძო ბანკს.

უგულავა, რომელმაც მოიპარა 48 მლნ და ამისთვის აქვს შეფარდებული სასჯელი. აღარ გავაგრძელებ. ეს ლიდერები, რომლებიც იპარავდნენ ხალხის ფულს, რომლებიც აწამებდნენ ადამიანებს და ა.შ. არიან დამნაშავეები და მათი დანაშაულები არის აღიარებული სხვადასხვა ინსტანციის მიერ, ვერც ერთი მათგანი ვერ ბედავს ვერც ერთი სასჯელის გაგზავნას სტრასბურგში, ესეც არის ძალიან მნიშვნელოვანი. ისინი არიან აღიარებული დამნაშავეები შესაბამისად, თუმცა რჩებიან პოლიტიკაში, რაც არის სისტემური პრობლემა ქართული პოლიტიკისთვის“, – განაცხადა ირაკლი კობახიძემ.