არჩილ თალაკვაძე: პოზიციები დაახლოვდა მთავარ სამომავლო საკითხებზე, რომლებიც მნიშვნელოვანი სფეროების რეფორმებს ეხება

ბატონმა ბორელმა გუშინ ძალიან მკაფიოდ თქვა, რომ აღიარებს საქართველოში ჩატარებული საპარლამენტო არჩევნების ლეგიტიმურობას და მას აღიარებს როგორც სამართლიან არჩევნებს, - ამის შესახებ საქართველოს პარლამენტის თავმჯდომარემ, არჩილ თალაკვაძემ ევროკავშირის წარმომადგენლობის ოფისში ხელისუფლებასა და ოპოზიციას შორის შეხვედრის დასრულების შემდეგ განაცხადა.

მისი თქმით, ოპოზიცია უნდა ჩაერთოს საპარლამენტო პროცესში, რომ პატივი სცენ საკუთარი ამომრჩევლის გადაწყვეტილებას.

„ბატონმა ბორელმა გუშინ ძალიან მკაფიოდ თქვა, რომ აღიარებს საქართველოში ჩატარებული საპარლამენტო არჩევნების ლეგიტიმურობას და მას აღიარებს როგორც სამართლიან არჩევნებს. ეს იყო ის, რაც ძალიან მკაფიოდ ითქვა. მეორე, რაც ვფიქრობ, ასევე იქნება ერთ-ერთი მნიშვნელოვანი ნიშნული ამ მოლაპარაკების გაგრძელებისთვის, ევროკავშირიდან გუშინ ძალიან მკაფიო გზავნილი გაკეთდა იმის შესახებ, რომ პარლამენტის, ან საარჩევნო ყუთის გვერდის ავლით, რის მცდელობასაც ვხედავდით ამ თვეების განმავლობაში, ევროკავშირი მხარს არ უჭერს ქვეყანაში არანაირ დემოკრატიულ პროცესს და მონაწილეობაზე უარის თქმა, რა თქმა უნდა, ეს არ არის დემოკრატია, ვინაიდან, თვითონ დემოკრატია დგას მონაწილეობაზე. ამიტომ გზავნილი მკაფიოა, ოპოზიცია უნდა ჩაერთოს საპარლამენტო პროცესში და არა იმიტომ, რომ „ქართული ოცნება“ ამისკენ მოუწოდებს, არამედ იმიტომ, რომ მათ პატივი უნდა სცენ საკუთარი ამომრჩევლის გადაწყვეტილებას. არ არსებობს არჩევნები, სადაც ორივე მხარე გამარჯვებულია. ამ არჩევნებში გაიმარჯვა „ქართულმა ოცნებამ“ და მეორე მხარემ პატივი უნდა სცეს საზოგადოების არჩევანს, თანაც, როდესაც გადამოწმების და გამოძიების ყველა შეთავაზება იყო ჩვენგან, თუმცა ახლა ამაზე საუბარი აღარ არის იმდენად აქტუალური. უკვე მნიშვნელოვანია, რომ პოზიციები დავაახლოვეთ მთავარ სამომავლო საკითხებზე, რომელიც მნიშვნელოვანი სფეროების რეფორმებს ეხება, რაზეც ჩვენ ჩვენი პოზიციებიც აქამდეც გაცხადებული გვქონდა და დღეს კიდევ უფრო მეტად გვაქვს ჩვენი ხედვა ამ რეფორმებთან დაკავშირებით ჩამოყალიბებული. მნიშვნელოვანია მოხდეს არგუმენტების სამართლიანი შეფასება, რის იმედსაც გვაძლევს ევროკავშირის ასეთი მაღალი ჩართულობა“, - განაცხადა არჩილ თალაკვაძემ.