არჩილ თალაკვაძე: „ქართული ოცნება“ სახელმწიფოსთვის მნიშვნელოვან საკითხებზე შეთანხმებისთვის მზად იყო, მაგრამ ოპოზიციამ პრიორიტეტი მიანიჭა პარტიულ საკითხებს

სახელმწიფოსთვის, საქართველოსა და ჩვენი მოქალაქეებისთვის მნიშვნელოვან საკითხებზე შეთანხმება დღეს შესაძლებელი იყო. ჩვენი მხრიდან ამის შესახებ სრული მზადყოფნა არსებობდა, სამწუხაროდ, ოპოზიცია არ იყო დღეს მზად შეთანხმების მისაღწევად, - ამის შესახებ საქართველოს პარლამენტის თავმჯდომარემ, არჩილ თალაკვაძემ ევროკავშირის წარმომადგენლობის ოფისში ხელისუფლებასა და ოპოზიციას შორის გამართული შეხვედრის დასრულების შემდეგ განაცხადა.

მისი თქმით, ოპოზიციამ პრიორიტეტი მიანიჭა არა იმ საკითხებს, რაც საქართველოს მოქალაქეებს სჭირდებათ, არამედ საკითხებს, რაც მათი პარტიული ინტერესის საგანია.

„სახელმწიფოსთვის, საქართველოსთვის და ჩვენი მოქალაქეებისთვის მნიშვნელოვან საკითხებზე შეთანხმება დღეს შესაძლებელი იყო. ჩვენი მხრიდან ამის შესახებ სრული მზადყოფნა არსებობდა. სამწუხაროდ, ოპოზიცია არ იყო დღეს მზად შეთანხმების მისაღწევად და მათ პრიორიტეტი მიანიჭეს არა საზოგადოებისა და საქართველოსთვის მნიშვნელოვან საკითხებს, არამედ იმ საკითხებს, რომელიც კონკრეტულად, მათი რამდენიმე პარტიისთვის არის პრიორიტეტი. ჩემ ამ შეფასებას ადასტურებს დღეს „ნაციონალური მოძრაობის“ წარმომადგენლის განცხადება, სადაც მან პირდაპირ თქვა, რომ მათთვის პრიორიტეტი იყო გიორგი რურუასა და ნიკა მელიას საკითხი. ვიმეორებ, დღეს შესაძლებელი იყო სახელმწიფოსა და საზოგადოებისთვის, ჩვენი მოქალაქეებისთვის მნიშვნელოვან, მთავარ თემებზე შეთანხმება. „ქართული ოცნების“ მხრიდან სრული მზადყოფნა იყო ამისთვის, თუმცა ოპოზიცია არ იყო მზად ამ ნაბიჯებისთვის და მათ პრიორიტეტი მიანიჭეს არა იმ საკითხებს, რაც საქართველოს და მოქალაქეებს სჭირდება, არამედ საკითხებს, რაც მათი პარტიული ინტერესის საგანია. ეს ერთი და მეორე, მედიაციისთვის მადლობა მინდა გადავუხადო ჩვენს საერთაშორისო პარტნიორებს. ნებისმიერ შემთხვევაში ეს დრო არ იყო დაკარგული დრო. იმ საკითხებზე, რაც საქართველოს და ჩვენ საზოგადოებას სჭირდება, პოზიციები დაახლოებულია და თუ მომავალში ოპოზიციას ექნება სამართლიანი და პრაგმატული დამოკიდებულება საკითხებთან, ჩვენ შევძლებთ ამაზე შეთანხმებას“, - განაცხადა არჩილ თალაკვაძემ.