არჩილ თალაკვაძე: საზოგადოების დაკვეთა შეთანხმებაა, თუ ამასაც ჩაშლის ოპოზიცია, ვფიქრობ, შემდეგ არჩევნებს ძალიან მცირე მხარდაჭერით შეხვდებიან

ოპოზიციის მხრიდან საკითხის ასე დაყენება, რომ პოლიტპატიმრები უნდა გახდეს ამ ქვეყანაში რაღაც მთავარ საკითხებზე შეთანხმების საგანი, თავისთავად, მიკერძოებული და არასწორია, - ამის შესახებ საქართველოს პარლამენტის თავმჯდომარემ, არჩილ თალაკვაძემ ევროკავშირის წარმომადგენლობის ოფისში ხელისუფლებასა და ოპოზიციას შორის შეხვედრის დასრულების შემდეგ განაცხადა.

მისი თქმით, წინა ხელისუფლებას 170-ზე მეტი პატიმარი ჰყავდა, ვისაც განსხვავებული პოლიტიკური პოზიცია ჰქონდა.

„დისკუსიაში, რასაც ე.წ. პოლიტპატიმრებს უწოდებთ, შემიძლია, შემოგყვეთ და გარწმუნებთ, რომ საკმაოდ დაძაბული საუბარი გვექნება, თუნდაც იმიტომ, რომ მაგალითად, მახსოვს, როდესაც უფლებადაცვით სფეროში ვმუშაობდი, წინა ხელისუფლებას 170-ზე მეტი პატიმარი ჰყავდა, ვისაც განსხვავებული პოლიტიკური პოზიცია ჰქონდა, ან ჟურნალისტი იყო და კრიტიკულად აშუქებდა მოვლენებს. ბევრი მათგანის მიმართ, არა მხოლოდ უკანონო პატიმრობა, არამედ არაადამიანური და ღირსების შემლახავი მოპყრობაც იყო გამოყენებული. ეს ჩვენ ყველას გვახსოვს. რას ნიშნავს პოლიტპატიმრობა, ეს ამ ქვეყანამ და ამ საზოგადოებამ ძალიან კარგად იცის. ამიტომ, მოდით, ამ ბრალდებებს დღეს ნუ გამოვიყენებთ, თუ ჩვენ გვინდა, რომ შევთანხმდეთ.

მიმაჩნია, რომ ოპოზიციის მხრიდან საკითხის ასე დაყენება, რომ პოლიტპატიმრები უნდა გახდეს ამ ქვეყანაში რაღაც მთავარ საკითხებზე შეთანხმების საგანი, თავისთავად, მიკერძოებული და არასწორია. პატიმრების საკითხი მართლმსაჯულების სისტემამ უნდა გადაწყვიტოს. ერთ შემთხვევაში სასამართლო ჩატარებულია, მეორე შემთხვევაში წინ არის სასამართლო პროცესები და ვფიქრობ, ოპოზიციის პარლამენტში ჩართულობა უფრო მეტად დაეხმარება იმას, რომ პარლამენტმაც თვალი ადევნოს, როგორ მიდის ეს პროცესები, რამდენად სამართლიანია ის შეჯიბრი, რაც სასამართლოში უნდა გაიმართოს“, - განაცხადა არჩილ თალაკვაძემ.

მისი თქმით, მოლაპარაკებებში საჭიროა ორივე მხრიდან ნაბიჯების გადადგმა და ამაზე იყო პარტნიორების ღია მოწოდებაც.

„როდესაც ხელისუფლებამ არაერთი შემხვედრი ნაბიჯი გადადგა და აქვს კონსტრუქციული დამოკიდებულება იმ მთავარ საკითხებზე, რომელიც ჩვენს მომავალს განსაზღვრავს, საჭიროა, ოპოზიციამაც რეალურად შეაფასოს არსებული ვითარება. თუ ჩვენ განვაგრძობთ განსხვავებების ძიებას, სადავო საკითხების შემოტანას დღის წესრიგში, მთავარი ყურადღების ქვეშ, მერწმუნეთ, ამ მოლაპარაკების წარმატებით დასრულება იქნება ძალიან რთული და ეს, საბოლოო ჯამში, დააზარალებს ჩვენს საზოგადოებას, ასევე, ძალიან დააზიანებს ოპოზიციას, ვინაიდან ერთი, რომ მათ საკუთარი ამომრჩევლების გადწყვეტილება არ გაითვალისწინეს, პარლამენტში არ შევიდნენ. მეორე – დღეს არის მთელი საზოგადოების დაკვეთა, მოხდეს შეთანხმება. თუ ამასაც ჩაშლის ოპოზიცია, ვფიქრობ, რომ შემდეგ არჩევნებს ისინი ძალიან მცირე მხარდაჭერით შეხვდებიან“, - განაცხადა არჩილ თალაკვაძემ.