ვახტანგ მეგრელიშვილი: როგორც ჩანს, მედიატორს დარჩა შთაბეჭდილება, რომ შეუძლებელი იყო ჩვენ რამეზე შევთანხმებულიყავით

შუამავლების იმედი გვქონდა, მაგრამ, როგორც ჩანს, მათ ჩათვალეს, რომ ეს შეუძლებელი იყო, - ამის შესახებ „გირჩის“ წევრმა, ვახტანგ მეგრელიშვილმა ხელისუფლებასა და ოპოზიციას შორის მოლაპარაკებებთან დაკავშირებით განაცხადა.

მისი თქმით, მათი მიზანი იყო „ქართულ ოცნებასა“ და „ნაციონალურ მოძრაობას“ შორის პრობლემა, ეს სიძულვილის ატმოსფერო დაძლეულიყო და მერე უკვე შესაძლებელი იყო რაღაც თემებზე საუბარი.

„არ ჩანდა ვინ და რა მიზეზით ჩაშალა მოლაპარაკებები, იმიტომ რომ ფორმატი დაგვხვდა შეცვლილი, ჩვენ ინდივიდუალურად ვესაუბრებოდით ელჩებს. შემდეგ შედეგის მომსწრენი გავხდით. ჯერ მივიღეთ შუალედური დოკუმენტი, რომელიც ყველასთვის მიუღებელი იყო და შემდეგ კომუნიკაცია შარლ მიშელის წარმომადგენელთან იყო ის, რომ დაგვემშვიდობა, ერთად შევიკრიბეთ და დაგვემშვიდობა. როგორც ჩანს, მედიატორს დარჩა შთაბეჭდილება, რომ შეუძლებელი იყო ჩვენ რამეზე შევთანხმებულიყავით.

იმ შემადგენლობით, რაც იყო მათი თანამშრომლობა შეუძლებელია. იყვნენ ოპოზიციის წარმომადგენლები, რომელთაც განსხვავებული პოზიცია ჰქონდათ. თუ იქნებოდა ისეთი პირობა, რომელიც მათთვის იქნებოდა მისაღები, ისინი ინდივიდუალური გადაწყვეტილების მისაღებად იყვნენ მზად.

ჩემი მიზანი იყო რომ „ქართულ ოცნებას“ და „ნაციონალურ მოძრაობას“ შორის პრობლემა დაძლეულიყო, ეს სიძულვილის ატმოსფერო დაძლეულიყო და მერე უკვე შესაძლებელი იყო რაღაც თემებზე საუბარი. პრობლემა იყო „ქართული ოცნების“ და ამ ადამიანების ურთიერთობა, რომელი არ გაფიქრებინებს რომ ესენი თუ მარტო დარჩნენ შეიძლება შეთანხმდნენ. იმედი გვქონდა შუამავლების და როგორც ჩანს, მათ ჩათვალეს, რომ ეს შეუძლებელი იყო“, - განაცხადა ვახტანგ მეგრელიშვილმა.

გუშინ, „ქართულ ოცნებასა“ და ოპოზიციას შორის უცხოელი პარტნიორების მედიატორობით გამართული ხანგრძლივი მოლაპარაკებები კონკრეტული შეთანხმების გარეშე დასრულდა. ევროპული საბჭოს პრეზიდენტის, შარლ მიშელის წარმომადგენელმა განაცხადა, რომ კრიზისის გადაწყვეტა დამოკიდებულია საქართველოს პოლიტიკურ ლიდერებზე. კრისტიან დანიელსონმა, რომელმაც ბრიუსელში დაბრუნების გადაწყვეტილება მიიღო, იმედი გამოთქვა, რომ პარტიები სერიოზულად დაფიქრდებიდან ვითარებაზე, გასავლელ გზაზე და ექნებათ საჭირო ნება და სურვილი, წავიდნენ კომპრომისზე.