მამუკა მდინარაძე: მოლაპარაკების რესურსი ყოველთვის არსებობს

მოლაპარაკების რესურსი ყოველთვის არსებობს. მათი საპროტესტო აქციების არავის ეშინია - ამის შესახებ „ქართული ოცნების” ცენტრალურ ოფისში გამართული უმრავლესობის სხდომის შემდეგ პარტიის აღმასრულებელმა მდივანმა, მამუკა მდინარაძემ განაცხადა.

მისი თქმით, მხოლოდ ხვალინდელ დღეზე კი არა, ქვეყნის გრძელვადიან დემოკრატიულ განვითარებაზე უნდა ისაუბრონ.

„მოლაპარაკების რესურსი ყოველთვის არის. მათი საპროტესტო აქციების არავის ეშინია, მიუხედავად იმისა, რომ მართლა მნიშვნელოვანია თითოეული, თუნდაც მათი მომხრის, პარტიული აქტივის აზრიც კი, რომელიც უკიდურესად სუბიექტურია ამ პროცესის შეფასების დროს. შეუძლებელია პროტესტმა უზრუნველყოს, რომ სახელმწიფოებრიობას, სამართლიანობასა და სამართალს დაუპირისპირდეს ჩვენი გადაწყვეტილებები. ამ კონკრეტული კომპრომისული წინადადებების ფონზე, პარალელურად ჩვენ არც კი ვსაუბრობთ და არც შევდივართ თემებში, რადგან ეს ის თემებია, სადაც სახელმწიფოსა და სამართლიანობის წინააღმდეგ უნდა წახვიდე და ბუნებრივია, ჩვენ ამაზე არ და ვერ წავალთ. ამას არც ამომრჩეველი გვაპატიებს და არც ჩვენთვის არის ეს მორალური. ჩვენ არ უნდა ვილაპარაკოთ მხოლოდ ხვალინდელ დღეზე, ჩვენ უნდა ვისაუბროთ ქვეყნის გრძელვადიან დემოკრატიულ განვითარებაზე“, - განაცხადა მამუკა მდინარაძემ.

18 მარტს „ქართულ ოცნებასა“ და ოპოზიციას შორის უცხოელი პარტნიორების მედიატორობით გამართული ხანგრძლივი მოლაპარაკებები კონკრეტული შეთანხმების გარეშე დასრულდა. ევროპული საბჭოს პრეზიდენტის, შარლ მიშელის წარმომადგენელმა განაცხადა, რომ კრიზისის გადაწყვეტა დამოკიდებულია საქართველოს პოლიტიკურ ლიდერებზე. კრისტიან დანიელსონმა, რომელმაც ბრიუსელში დაბრუნების გადაწყვეტილება მიიღო, იმედი გამოთქვა, რომ პარტიები სერიოზულად დაფიქრდებიან ვითარებაზე, გასავლელ გზაზე და ექნებათ საჭირო ნება და სურვილი, წავიდნენ კომპრომისზე.

დღეს რადიკალური ოპოზიცია კვლავ შეიკრიბა. შეხვედრის დასრულების შემდეგ, მათ კვლავ აქციები დააანონსეს.