კობახიძე: კონსენსუსთან დაკავშირებით ჩვენ ველოდებით წინადადებებს ოპოზიციისგან

"კონსენსუსთან დაკავშირებით ჩვენ ველოდებით წინადადებებს ოპოზიციისგან და რატომ? ჩვენ გვქონდა ჩვენი წინადადებები და ეს ავსახეთ დოკუმენტში, აქედან გამომდინარე, თავისი წინადადებები ახლა უკვე ოპოზიციამ უნდა წამოაყენოს და დაველოდებით, რა წინადადებები ექნებათ, ჩვენ ყურადღებით განვიხილავთ ყველა წინადადებას", - განაცხადა საქართველოს პარლამენტის თავმჯდომარემ ირაკლი კობახიძემ. მისივე თქმით, საკონსტიტუციო ცვლილებების მესამე მოსმენამდე 3 თვეა. შესაბამისად, კონსულტაციებისთვის დრო არსებობს.

ირაკლი კობახიძემ მომდევნო საპარლამენტო არჩევნებისთვის ბლოკების შენარჩუნებასთან დაკავშირებითაც გააკეთა კომენტარი. "მთავრობასთან სრული კოორდინაცია არსებობს და სწორედ ამიტომ, ჩვენ ველოდებით კონკრეტულ წინადადებებს. ჩვენ მზად ვართ სუფთა ფურცლიდან დავიწყოთ მოლაპარაკებები. ამასთან, არის გარკვეული საკითხები, რომელიც კონსენსუსის საფუძველი იყო მმართველ გუნდში და ეს საკითხები ვერ გახდება გადასინჯვის საგანი", - დასძინა პარლამენტის თავმჯდომარემ.

რაც შეეხება საკითხს, რომ თითქოს ეს არის პრეზიდენტის წინააღმდეგ მიმართული პროცესი, ირაკლი კობახიძე ამბობს, რომ მმართველმა გუნდმა ფაქტებით დაამტკიცა, რომ პრეზიდენტის წინააღმდეგ არ მოქმედებს. "ასეთი კონსულტაციებისთვის აბსოლუტურად ღია ვართ. შესაბამისად, ამ ფორმატში შეგიძლია კონსულტაციები გავმართოთ პოლიტიკურ პარტიებთან. რაც შეეხება იმას, რომ თითქოს, რაიმე მიმართულია პრეზიდენტის წინააღმდეგ და კონკრეტულად საკონსტიტუციო რეფორმა, ჩვენ კონკრეტული ფაქტებით და არგუმენტებით დავამტკიცეთ, რომ პრეზიდენტის წინააღმდეგ არაფერი არ იყო მიმართული. საუბარი იყო საპრეზიდენტო არჩევნებზეც და თავიდანვე განვაცხადეთ და საბოლოო ჯამში, კონსტიტუციურ პროექტში ავსახეთ, რომ მომავალ წელს საპრეზიდენტო არჩევნების პირდაპირი წესი რჩება. რაც შეეხება სტატუსს და კომპეტენციებს, აქ ცვლილება არ გვაქვს - სტატუსიც იგივე რჩება, კომპეტენციებიც არსებითად იგივეა. შესაბამისად, საკონსტიტუციო რეფორმით დადასტურდა, რომ პრეზიდენტის წინააღმდეგ მიმართული არაფერი არ იყო. საკონსტიტუციო რეფორმის მთავარი მიზანი და ამოცანა, დახვეწილი საპარლამენტო მმართველობა იყო", - განაცხადა კობახიძემ.

საკონსტიტუციო ცვლილებების შესახებ კონსენსუსის მიღწევისკენ ქართულ პოლიტიკურ სპექტრს ვენეციის კომისიის მდივანი ტომას მარკეტერი და კომისიის პრეზიდენტი ჯანი ბუკიკიო მოუწოდებენ.

პრეზიდენტის ადმინისტრაცია კონსტიტუციასთან დაკავშირებით კონსენსუსის მიღწევის მიზნით პოლიტიკურ პარტიებს შეხვედრას სთავაზობს. გუშინ პრეზიდენტის შეთავაზებას პრემიერმინისტრი გიორგი კვირიკაშვილი გამოეხმაურა.

პრეზიდენტი გიორგი მარგველაშვილი საკონსტიტუციო რეფორმის პროცესში შექმნილი მდგომარეობიდან ერთადერთ გამოსავალს "ნაჩქარევად, ორი მოსმენით მიღებული ერთპარტიული პროექტის" შეჩერებაში ხედავს.