გიორგი ახვლედიანი: ოპოზიციის ნაწილი საკონსტიტუციო საკითხებზე მოლაპარაკებებში არ ჩაერთვება

საკონსტიტუციო რეფორმაზე მოლაპარაკებები შესაძლოა ჩაიშალოს. ოპოზიციური პარტიების ნაწილი მოლაპარაკებებზე უარს ამბობს, მათ შორის ბოიკოტის მომხრეა ნინო ბურჯანაძის პოლიტიკური გუნდიც.

„ხელისუფლებამ გვითხრა, ვინც მოხვალთ მოლაპარაკებებზე, მხოლოდ ბლოკებზე გვესაუბრეთო. მოლაპარაკებები შეუძლებელი ხდება, რადგან ბლოკებზე საუბარს ჩვენ არ ვაპირებთ. ჩვენ სისტემის შეცვლაზე გვინდა საუბარი და ამის ბლოკებზე გაცვლას არ ვაპირებთ“, - განაცხადა გიორგი ახვლედიანმა. მისივე თქმით, მოლაპარაკებაზე უარს „ნაციონალური მოძრაობა“, „თავისუფალი დემოკრატები“ და სხვა პარტიებიც ამბობენ.

როდის გაიმართება მსჯელობა დიალოგის ფორმატში, ჯერ უცნობია, თუმცა ბურჯანაძის პარტიისგან განსხვავებით მოლაპარაკებათა მაგიდასთან დასაჯდომად მზად არიან „ახალი მემარჯვენეები“.

„ჩვენ შეთანხმების მომხრე ვართ, როცა რომელიმე მხარე წინაპირობას აყენებს, ისედაც ჩიხში შესული პროცესი კიდევ უფრო რთულდება“, - ამბობს მამუკა კაციტაძე. 

საკონსტიტუციო ცვლილებების შესახებ კონსენსუსის მიღწევისკენ ქართულ პოლიტიკურ სპექტრს ვენეციის კომისიის მდივანი ტომას მარკეტერი და კომისიის პრეზიდენტი ჯანი ბუკიკიო მოუწოდებენ.