ზურაბ ჯაფარიძე: ჩვენს დასავლელ მეგობრებს მცდარი პოზიცია უჭირავთ, როდესაც ორივე მხარეს მოუწოდებენ კომპრომისებისკენ

ჩემი აზრით, ჩვენს მეგობრებს მცდარი პოზიცია უჭირავთ, როდესაც ორივე მხარეს მოუწოდებენ კომპრომისებისკენ. მე არ მესმის, რას ნიშნავს კომპრომისი, როდესაც საუბარია სასამართლოს დამოუკიდებლობაზე ან თავისუფალი არჩევნების ჩატარებაზე. სასამართლო ან დამოუკიდებელია, ან არ არის, სად გადის აქ კომპრომისი? ვიდრე ჩვენი მეგობრები დიპლომატიური ენით, მოზომილად ისაუბრებენ, „ქართული ოცნება“ არაფერს დათმობს, - ამის შესახებ ევროპული საბჭოს პრეზიდენტის პირად წარმომადგენელთან, კრისტიან დანიელსონთან შეხვედრის შემდეგ „გირჩი - მეტი თავისუფლების“ ლიდერმა, ზურაბ ჯაფარიძემ განაცხადა.

„მოლაპარაკებების პროცესი ამჯერადაც დაახლოებით იმ სცენარით წარიმართა, როგორც წინა ჯერზე. მიუხედავად იმისა, რომ შეთანხმების ტექსტთან დაკავშირებით ოპოზიციას პრინციპული პოზიცია გვქონდა ხელახალი არჩევნებისა და პოლიტპატიმრების საკითხებთან დაკავშირებით, ამის გარდა იყო კიდევ სამი საკითხი, რომელზეც „ქართული ოცნება“ არ თანხმდებოდა. ისევე, როგორც წინა ჯერზე, მედიატორებმა ვერ დადეს ისეთი ტექსტი, რომელსაც „ქართული ოცნებაც“ მოაწერდა ხელს. სამწუხაროდ, შეთანხმება ვერ შედგა და ამაზე მთელი პასუხისმგებლობა ხელისუფლებას ეკისრება. ის სამი საკითხი, რომელზეც ოპოზიცია თანხმდებოდა, პირადად ჩემთვის არაა პრინციპულად მნიშვნელოვანი, ვინაიდან მე არ მჯერა, რომ იქ დაწერილი ტექსტებით შეიძლება მართლა რამე შეიცვალოს მართლმსაჯულების სისტემაში. ძალაუფლების გადანაწილებას რაც ეხება, კომიტეტის თავმჯდომარეობა მე საინტერესოდ არ მაინტერესებს. ჩემთვის პრინციპული საკითხი იყო საარჩევნო რეფორმის საკითხი. მე ყოველთვის ვითხოვდი სრულად პროპორციულს ბარიერის გარეშე, ვერ მივაღწიე ამას, მაგრამ მზად ვიყავი, ამაზე თვალი დამეხუჭა“, - განაცხადა ზურაბ ჯაფარიძემ.

მისივე თქმით, ბიძინა ივანიშვილი წავიდა პოლიტიკიდან, სიის პირველი ნომერი გიორგი გახარია წავიდა თანამდებობიდან და პრემიერი არის ადამიანი, რომელიც საერთოდ არ ყოფილა საარჩევნო სიაში და დაპირება არ გაუცია.

„ნებისმიერ ნორმალურ ქვეყანაში ამის შემდეგ ხელახალი არჩევნები დაინიშნებოდა. ჩემი აზრით, ჩვენს მეგობრებს მცდარი პოზიცია უჭირავთ, როდესაც ორივე მხარეს მოუწოდებენ კომპრომისებისკენ. მე არ მესმის, რას ნიშნავს კომპრომისი, როდესაც საუბარია სასამართლოს დამოუკიდებლობაზე ან თავისუფალი არჩევნების ჩატარებაზე. სასამართლო ან დამოუკიდებელია, ან არ არის, სად გადის აქ კომპრომისი? ვიდრე ჩვენი მეგობრები დიპლომატიური ენით, მოზომილად ისაუბრებენ, „ქართული ოცნება“ არაფერს დათმობს“, - განაცხადა ჯაფარიძემ.

კრისტიან დანიელსონის მედიაციით მმართველ გუნდსა და ოპოზიციის შორის მოლაპარაკებების მეორე რაუნდი გაიმართა.