ირაკლი კობახიძე: არცერთი ევროპული ქვეყნის კონსტიტუციაში არ წერია, რომ გენპროკურორები კვალიფიციური უმრავლესობით აირჩევიან

არცერთი ევროპული ქვეყნის კონსტიტუციაში ან აშშ-ის კონსტიტუციაში არ წერია, რომ გენპროკურორები აირჩევიან კვალიფიციური უმრავლესობით. ეს ძალიან მარტივი საკითხია და დარწმუნებულები ვიყავით, რომ ჩვენი არგუმენტების შედეგად, ეს საკითხი ამოღებული იქნებოდა დოკუმენტიდან, - ამის შესახებ ჟურნალისტებს „ქართული ოცნების“ თავმჯდომარემ, ირაკლი კობახიძემ განუცხადა.

„რაც შეეხება ცესკოს 2/3-ს, ჩვენ რამდენიმე კითხვა გვქონდა. როდესაც ცესკოს წევრების არჩევისთვის არის მოთხოვნილი დეპუტატების 2/3, ოპოზიციის თანხმობის გარეშე პროფესიული ნიშნით წევრები ვერ აირჩევიან. მუნიციპალურ არჩევნებამდე ჩნდებოდა 2 ვაკანსია, 2024 წლის არჩევნებამდე - 8 ვაკანსია. თუ ოპოზიცია საერთოდ არ დაუჭერს მხარს ცესკოს წევრების არჩევას, გვაქვს შემდეგი მოცემულობა: 5 წევრი არის პროფესიული ნიშნით, 1 - „ქართული ოცნებიდან“ და მათ საბოტაჟის ინტერესი არ აქვთ, დანარჩენი 8 არის ოპოზიციის წარმომადგენელი და მათ ეძლევათ საბოტაჟის შესაძლებლობა. ამაზე გვინდოდა მსჯელობა და კითხვის დასმა, თუმცა ეს არ იყო ულტიმატუმი. გვინდოდა, გვეკითხა, იყო თუ არა საბოტაჟის რისკი, იმის გათვალისწინებით, რომ 8-დან 7 პარტია დღეს საბოტაჟის რეჟიმშია?“ - განაცხადა კობახიძემ.

მან ასევე ისაუბრა გენპროკურორი არჩევის წესზე და აღნიშნა, რომ ეს იყო ნონსენსი, რომლის მსგავსიც არცერთი ევროპული ქვეყნის კონსტიტუციაში არ წერია.

„სახელმწიფოებრივად ცოტა არასწორია, რომ საკონსტიტუციო ნორმები იცვლება მოკლევადიანი პოლიტიკური დიალოგის პროცესში, მაგრამ ამას თავი დავანებოთ და წარმოვიდგინოთ ასეთი რამ: დავუშვათ, რომ არჩევნები ჩატარდა და „ქართულმა ოცნებამ“ აიღო 51 მანდატი. 2026 წელს ასარჩევია ახალი გენპროკურორი და „ქართულ ოცნებას“ ძველი შემადგენლობის დატოვება უნდა. 51 ხმით ჩვენ დავტოვებთ ძველ პროკურორს - ეს რომ არის ნონსენსი, ამიტომ არ წერია არცერთი ევროპული ქვეყნის კონსტიტუციაში ან აშშ-ის კონსტიტუციაში, რომ გენპროკურორები აირჩევიან კვალიფიციური უმრავლესობით. ეს ძალიან მარტივი საკითხია და დარწმუნებულები ვიყავით, რომ ჩვენი არგუმენტების შედეგად, ეს საკითხი ამოღებული იქნებოდა დოკუმენტიდან. დოკუმენტი პრინციპულად იყო მისაღები და ჩვენ თანხმობა გამოვთქვით, უბრალოდ გვინდოდა ამ 4 საკითხზე მსჯელობა, რომელთაგან არცერთი არ იყო წყალგამყოფი, თუმცა მსჯელობამდე საქმე არ მისულა“, - განაცხადა კობახიძემ.

30 მარტს კრისტიან დანიელსონის მედიაციით მმართველ გუნდსა და ოპოზიციის შორის მოლაპარაკებების მეორე რაუნდი გაიმართა.