ოთარ კახიძე: არ არის კარგი, როდესაც ვინმე პარტიას ტოვებს, მაგრამ არიან არანაკლებ გამოცდილი ფიგურები, რომლებიც გიგი უგულავასა და დავით ბაქრაძეს ღირსეულად ჩაანაცვლებენ

არ არის კარგი, როდესაც ვინმე პარტიას ტოვებს, მაგრამ არიან არანაკლებ გამოცდილი ფიგურები, რომლებიც გიგი უგულავასა და დავით ბაქრაძეს ღირსეულად ჩაანაცვლებენ, ვგულისხმობ აკაკი ბობოხიძეს, გიგი წერეთელს და გიგა ბოკერიას, - ამის შესახებ „ევროპული საქართველოს“ წევრმა, ოთარ კახიძემ განაცხადა.

მისივე თქმით, „ევროპულ საქართველოს“ საზოგადოებისთვის ცნობილი, გამოცდილი პოლიტიკოსების ნაკლებობა არასდროს ჰქონია.

„ყოფილი თანაგუნდელებისგან განსხვავებით, არ ვაპირებ არც მათკენ ხელის გაშვერას, არც რაიმე ტიპის უკუგადაბრალებას და ეს განხილვები არ მიმაჩნია ზოგადად ლამაზად. რაც შეეხება მათ წასვლას არ არის კარგი, როდესაც პარტიას ვინმე ტოვებს, მაგრამ არანაკლებ გამოცდილი ფიგურები არიან ჩვენს პარტიაში, რომლებიც მოახერხებენ მათ ღირსეულად ჩანაცვლებას, ვგულისხმობ აკაკი ბობოხიძეს, გიგი წერეთელს, ყველაზე დიდი სტაჟის მქონე პარლამენტარებს და ძალიან დიდი გამოცდილების მქონე პოლიტიკოსებს, ასევე გიგა ბოკერიას, რომელსაც მე განვიხილავ „ევროპული საქართველოს“ თავმჯდომარედ. იმედი მაქვს, რომ ამ საკითხთან დაკავშირებით იქნება საერთო პოზიცია. ვთვლი, რომ ის არის გამორჩეული ფიგურა თავისი პრინციპულობით, პირველ რიგში, თანმიმდევრულობით და იმ ღირებულებების ერთგულებით, რომელსაც ეფუძნებოდა ზოგადად „ვარდების რევოლუცია“ 2003 წელს. დანაკლისი, რომელიც ნამდვილად სახეზეა, ღირსეულად შეივსება და ახალი ლიდერები პარტიას მოუტანენ ძალიან ბევრ სიახლეს, მათ შორის ძალიან მნიშვნელოვანია ამომრჩევლებთან ახლო კომუნიკაცია“, - განაცხადა ოთარ კახიძემ.

კითხვაზე, რის გამო მოხდა პარტიის დაყოფა და დაპირისპირება, კახიძე ამბობს, რომ ამბობს, რომ მიზანშეწონილად არ მიაჩნია, ყოფილ თანაგუნდელებზე საუბარი, თუმცა აქვე აღნიშნავს, რომ პარტიაში დაპირისპირება არსებობდა.

„დაპირისპირებასთან დაკავშირებით, ამ საკითხების განხილვას არ ვთვლი მიზანშეწონილად, რადგან ეს მაინც გამოიწვევს ყოფილ თანაგუნდელებზე საუბარს. დაპირისპირებები არსებობდა, ეს იყო საჯარო და მათ შორის ჩემსა და გიგის შორისაც იყო პრობლემები, რომლებიც საჯარო განხილვის თემა გახლდათ. ოღონდ, არ მინდა, ამ საკითხებს მივუბრუნდე და ხელის გაშვერა დავიწყო ყოფილი თანაგუნდელების მიმართ, რომელთანაც მაკავშირებს საერთო ბრძოლა და საერთო გამოცდილება“, - განაცხადა ოთარ კახიძემ.

„ევროპული საქართველოს“ თავმჯდომარისა და პარტიის დატოვების შესახებ ცოტა ხნის წინ განცხადება დავით ბაქრაძემ გაავრცელა. „ევროპული საქართველოს“ დატოვების შესახებ განცხადება დღეს გიგი უგულავამაც გაავრცელა.