გიგა ბოკერია: სამწუხაროა, რომ დღეს ჩვენთან ერთად არ არიან ჩვენი ყოფილი თანაგუნდელები

დავიწყებ უსიამოვნო ამბით, ამის გამოტოვება არ შეიძლება. სამწუხაროა, რომ დღეს ჩვენთან ერთად არ არიან აწ უკვე ჩვენი ყოფილი თანაგუნდელები, არაერთი ლიდერი, ვისთან ერთადაც ჩვენ მთელი ეს რთული გზა გავიარეთ, - ასე ეხმაურება „ევროპული საქართველოს“ თავმჯდომარე, გიგა ბოკერია ყოფილი თანაგუნდელების გადაწყვეტილებას პარტიის დატოვებასთან დაკავშირებით.

მისი თქმით, ყოფილმა თანაგუნდელებმა პარტიის დატოვებაზე გადაწყვეტილება რთულ დროს მიიღეს.

„მე მიმაჩნია ეს მცდარ და სამწუხარო გადაწყვეტილებად მათი მხრიდან, ამას არ დავმალავ და კიდევ ერთხელ ვიტყვი. ვისურვებდი, რომ ეს ასე არ ყოფილიყო, განსაკუთრებით ასეთ რთულ ვითარებაში, არა მხოლოდ პარტიისთვის, არამედ - ქვეყნისთვის, მაგრამ რა თქმა უნდა, პატივი უნდა ვცეთ მათ მოსაზრებასა და გადაწყვეტილებას. მინდა, ვისარგებლო შემთხვევით და მადლობა ვუთხრა მათ ყველას ერთად განვლილი გზისთვის და წარმატება ვუსურვო მომავალ გზაზე, თუ რა თქმა უნდა, ეს გზა ემთხვევა ჩვენ ღირებულებებსა და ინტერესებს. ჩვენ გვაქვს ამის მაგალითები, მე ვიყავი ერთ გუნდში ისეთ ადამიანებთან, რომელთა წასვლაც სამწუხარო იყო. ცოტა ხნის წინ მოხდა ეს ასევე. ჩემი მეგობარი ელენე ხოშტარია თავის პოლიტიკურ გზაზე დადგა, მანამდე იყო მაგალითად ზურაბ ჯაფარიძე, ერთ პოლიტიკურ გუნდში ვიყავით, მაგრამ თავის გზაზე დადგა. მაგრამ ეს ორი ადამიანი ჩემი არა მხოლოდ მეგობარია, განსაკუთრებით ელენე, არამედ პოლიტიკური ღირებულებებით ჩვენ ახლოს ვართ“, - განაცხადა გიგა ბოკერიამ.

ის უგულავას განცხადებას გამოეხმაურა, რომელმაც აღნიშნა, რომ ბოკერიას გადაწყვეტილება მისთვის „ლამაზად შეფუთული უპასუხისმგებლობაა“

„ძალიან ვწუხვარ, რომ გიგიმ თავი ვერ შიეკავა პოლიტიკური ჩხვლეტისგან, მაგრამ მინდა, მას ისევე როგორც ყველა სხვას, კიდევ ერთხელ მადლობა ვუთხრა აქამდე განვლილი დღეებისთვის", - განაცხადა გიგა ბოკერიამ.

„ევროპულ საქართველოს“ ახალი ხელმძღვანელები ჰყავს. პარტიის ყრილობაზე თავმჯდომარედ გიგა ბოკერია, გენერალურ მდივნად კი აკაკი ბობოხიძე აირჩიეს.

მანამდე ცნობილი გახდა, რომ პარტია ყოფილმა თავმჯდომარემ, დავით ბაქრაძემ და გენერალურმა მდივანმა, გიგი უგულავამ დატოვეს. რამდენიმე თვის წინ „ევროპული საქართველო“ კიდევ ერთმა ლიდერმა, ელენე ხოშტარიამ დატოვა.