ზურაბ ჯაფარიძე ევროპელი მედიატორების შემოთავაზებულ დოკუმენტს ხელს მოაწერს

პარტია „გირჩი - მეტი თავისუფლებას“ თავმჯდომარე, ზურაბ ჯაფარიძე Facebook-ის საკუთარ გვერდზე წერს, რომ ევროპელი მედიატორების შემოთავაზებულ დოკუმენტს ხელს მოაწერს.

„ხელს ვაწერ მომლაპარაკებლების მიერ შემოთავაზებული შეთანხმების ტექსტს. ხელს ვაწერ სამი რამის გამო:

1. ახალ დოკუმენტში დევს პოლიტპატიმრების გათავისუფლების კონკრეტული მექანიზმები;

2. ვითვალისწინებ ჩვენი სტრატეგიული პარტნიორების აზრს;

3. არის შანსი, შემდეგი ორი საპარლამენტო არჩევნები ჩარატარდეს სრულად პროპორციულად და დაბალი ბარიერით, რამაც უნდა დაასრულოს არსებული პოლარიზაცია და ერთპარტიული მმართველობა.

- არ მჯერა, რომ ამ დოკუმენტით მოხდება კრიზისის განმუხტვა;

- არ მჯერა, რომ ამ დოკუმენტით მართლმსაჯულების სისტემას რამე ეშველება;

- არ მჯერა, რომ ამ დოკუმენტით მნიშვნელოვნად გაუმჯობესდება საარჩევნო გარემო;

- არ მჯერა, რომ ამ დოკუმენტით მოხდება ძალაუფლების რეალური გადანაწილება ოპოზიციაზე;

- არ მჯერა, რომ ამ დოკუმენტით პოლიტიკური დევნა დასრულდება ამ ქვეყანაში;

- არც იმის მჯერა, რომ ივანიშვილი და „ოცნება“ ამ დოკუმენტის პუნქტებს ზედმიწევნით შეასრულებენ.

რისიც მჯერა, არის ბრძოლა, მუდმივი ბრძოლა. ეს ქვეყანა არ გახდება თურქმენეთი, არასდროს. ასევე, ჩემი ეს გადაწყვეტილება, იმედი მაქვს, მხოლოდ სიმბოლური ხასიათის მატარებელი აღმოჩნდება, რადგან 22-23 აპრილს მაქვს პროცესი საკონსტიტუციო სასამართლოში, სადაც ვითხოვ საქართველოს პარლამენტის იმ დადგენილების არაკონსტიტუციურად ცნობას, რომლითაც უარი მეთქვა მანდატის გაუქმებაზე. ვაპირებ, ეს დავა ბოლომდე მივიყვანო. მანამდე, პარლამენტში მონაწილეობას მივიღებ მხოლოდ შეთანხმების დოკუმენტით გათვალისწინებული საკითხების განხილვა/გატანაში. დაბოლოს: მადლობა ყველა ჩვენს მეგობარს, ვინც თვეების განმავლობაში ჩართული იყო მოლაპარაკებების პროცესში, განსაკუთრებით - აშშ-ს და ევროკავშირის ელჩებს საქართველოში. არ მგონია, ბოლომდე გვქონდეს გააზრებული, რას ნიშნავს ასეთი მეგობრების ყოლა“, - წერს ზურაბ ჯაფარიძე.

გუშინ ზურაბ ჯაფარიძემ, შარლ მიშელის წინადადებაზე საუბრისას თქვა: „დოკუმენტი არ მომწონს, არ მჯერა, რომ ის კრიზისიდან გამოიყვანს ქვეყანას“.

ევროპული საბჭოს პრეზიდენტმა, შარლ მიშელმა პოლიტიკურ პარტიებს ახალი წინადადება შესთავაზა. მას ხელი „გირჩმა“ მოაწერა. ცოტა ხნის წინ ცნობილი გახდა, რომ ევროპელი მედიატორის მიერ შედგენილ დოკუმენტს ხელს „ლელოც“ მოაწერს.