სალომე სამადაშვილი: ჩვენი პირველი ჩართულობა პარლამენტის საქმიანობაში უკავშირდება ამნისტიის შესახებ კანონპროექტს

ოპოზიციის მუშაობა მხოლოდ ამ ამნისტიის კანონთან მიმართებაში დაიწყება. კანონის მიღების შედეგად, ნიკა მელიას გათავისუფლების შემდეგ კი, შევალთ იმ ფაზაში, როდესაც ოპოზიციას სრული შემადგენლობით შეგვიძლია, ყველა დანარჩენ საკითხზეც დავიწყოთ მუშაობა, - ამის შესახებ პარლამენტის წევრმა, სალომე სამადაშვილმა პარლამენტში, ევროპული საბჭოს პრეზიდენტისა და პოლიტიკური პარტიების წარმომადგენლების შეხვედრის დასრულების შემდეგ განაცხადა.

მისივე თქმით, სურს, მას შემდეგ, რაც მიღებული კანონის საფუძველზე, ნიკა მელია გათავისუფლდება, პარლამენტში სხვა ოპოზიციონერებიც, მათ შორის, „ნაციონალური მოძრაობის“ წევრებიც იხილოს.

„პოლიტპატიმრების გათავისუფლება არის წინაპირობა იმისთვის, რომ შევძლოთ შეთანხმების სრულფასოვნად შესრულება. იმედი გვაქვს, რომ საქართველოს პრეზიდენტი, უახლოეს დღეებში, გიორგი რურუასთან დაკავშირებით, შესაბამის ნაბიჯებს გადადგამს. რაც შეეხება ნიკა მელიას საკითხს: ჩვენ კიდევ ერთხელ ავუხსენით პრეზიდენტ მიშელს, თუ რატომ არის მნიშვნელოვანი, რომ მოიძებნოს გზა მის გასათავისუფლებლად, რომელიც არ უკავშირდება გირაოს გადახდას. დღეს არც იურიდიულად არსებობს გირაო და არც ბატონი მელიას სურვილი ეს არაა. თუ ხელისუფლება, უახლოეს დღეებში, არ გამოიყენებს რაიმე მექანიზმებს მის გასათავისუფლებლად, შეთანხმების თანახმად, ერთ კვირაში, შემდეგ ორშაბათს პარლამენტის ბიუროზე უნდა დარეგისტრირდეს ამნისტიის კანონი. ოპოზიციის მუშაობა მხოლოდ ამ ამნისტიის კანონთან მიმართებაში დაიწყება. კანონის მიღების შედეგად, ნიკა მელიას გათავისუფლების შემდეგ კი, შევალთ იმ ფაზაში, როდესაც ოპოზიციას სრული შემადგენლობით შეგვიძლია, ყველა დანარჩენ საკითხზეც დავიწყოთ მუშაობა. იმედი მაქვს, რომ ამაში, ნიკა მელიას გათავისუფლების შემდეგ, ბევრი სხვა ოპოზიციონერი დეპუტატიც შემოგვიერთდება, მათ შორის „ერთიანი ნაციონალური მოძრაობიდან“, - აღნიშნა სალომე სამადაშვილმა.

ის ასევე გამოეხმაურა „ნაციონალური მოძრაობის“ მომხრეების რეაქციას, რომელიც ორბელიანების სასახლეში მის მისვლასა და შეთანხმების დოკუმენტზე ხელის მოწერას მოჰყვა.

„მე, ზოგადად, ბულინგზე ყოველთვის მკაცრად ვსაუბრობ, თუნდაც ის ოპონენტს ეხებოდეს. ალბათ გახსოვთ ჩემი განცხადებები, როდესაც სალომე ზურაბიშვილი გენდერული ნიშნით შერჩევითი ბულინგის მსხვერპლი იყო. მიმაჩნია, რომ ეს შეურაცხყოფს საზოგადოებრივ სივრცესა და საჯარო დისკუსიას. მნიშვნელოვანია, რომ ყველა საზოგადოებრივმა აქტიურმა მოთამაშემ ბულინგთან დაკავშირებით საკუთარი აზრი დააფიქსიროს“, - განაცხადა სამადაშვილმა.

შარლ მიშელი დღეს უკვე შეხვდა პრეზიდენტ სალომე ზურაბიშვილსა და საქართველოს პრემიერ-მინისტრს, ირაკლი ღარიბაშვილს. ამასთანავე, ვიზიტის ფარგლებში ევროპული საბჭოს პრეზიდენტი პარლამენტის თავმჯდომარეს, არჩილ თალკვაძესა და პოლიტიკური პარტიების წარმომადგენლებს შეხვდა. დღესვე, სალომე ზურაბიშვილის სახელით, შარლ მიშელის პატივსაცემად სადილი გაიმართება.

შარლ მიშელის მიერ წარდგენილ დოკუმენტს - „საქართველოს წინსვლის გზა“ პარტიებმა ხელი ოფიციალურად 19 აპრილს მოაწერეს.