კახა კუჭავა სალომე სამადაშვილს: ნებისმიერი პოლიტიკური სპეკულაცია იმ საკითხებთან დაკავშირებით, რომლებიც ჩვენს მტერს აძლევს ხელს, არაა მოსაწონებელი იმ ადამიანებისგან, ვინც ევროატლანტიკურ ინტეგრაციაზე დებთ თავს

„ქალბატონო სალომე, დანაშაული ყველგან ხდება და სამწუხაროდ, საქართველო არაა ერთადერთი, სადაც ევროკავშირის დროშას ხევენ. სამწუხაროდ, ჩვენთან არ არსებობს საკანონმდებლო ბაზა, თუ როგორ დავიცვათ, ჩვენი, ეროვნული სიმბოლიკის გარდა, ის სიმბოლიკა, რომელიც ჩვენი ხალხის არჩევანია და კონსტიტუციითა განსაზღვრული. სჯობს, ამაზე ვიმსჯელოთ, რათა შემდგომში, მსგავსი რაღაც არ მოხდეს და დადგინდეს, ვინ როგორ დაისაჯოს მსგავსი ქმედებისთვის და არა ის, თუ ვინ ვის დაახია თავზე დროშა“, - ასე უპასუხა საქართველოს პარლამენტის თავმჯდომარემ სალომე სამადაშვილის განცხადებას.

კახა კუჭავამ აღნიშნა, რომ უმჯობესია, ოპოზიციამ აიღოს პასუხისმგებლობა და ჩაერთოს ამ საკითხის საკანონმდებლო დონეზე მოწესრიგების საკითხში.

„ძალიან კარგად იცით, როგორი იყო ჩვენი ევროპელი პარტნიორების რეაგირება ამასთან დაკავშირებით, ნუ ცდილობთ, შეურაცხყოთ ის, რაც ჩვენი ქვეყნისთვის უმნიშვნელოვანესია - ჩვენი ევროატლანტიკური ინტეგრაცია. აქ გამოსვლები, სამწუხაროდ, არაფერში არ გაძლევთ ხელს. არავინ ამბობს, რომ რაც მოხდა, კარგი იყო, მაგრამ ვერ ნახეთ სამართლებრივი ნორმა, როგორ შეიძლება, ეს დავიცვათ და პასუხი ვაგებინოთ, ერთად ვიმსჯელოთ ამაზე, თუ საჭიროა, საკანონმდებლო ცვლილებები განვახორციელოთ, რათა შემდეგ ჯერზე, უფრო ეფექტიანად დავიცვათ ჩვენი ქვეყნის სიმბოლიკა, რომლის ნაწილსაც წარმოადგენს ევროკავშირის დროშა, რომელიც ჩვენი ევროატლანტიკური გზის კონსტიტუციური ნორმაა. ნებისმიერი პოლიტიკური სპეკულაცია იმ საკითხებთან დაკავშირებით, რომლებიც არა ჩვენს ქვეყანას, არამედ, ჩვენს მტერს აძლევს ხელს, ნამდვილად არაა მოსაწონებელი იმ ადამიანებისგან, ვინც ევროატლანტიკურ ინტეგრაციაზე დებთ თავს“, - აღნიშნა კახა კუჭავამ.

პარლამენტში რიგგარეშე სხდომა მას შემდეგ დაიწყო, რაც ოპოზიციის წარმომადგენლებს პარლამენტის თავმჯდომარისთვის განკუთვნილი ტრიბუნა გაათავისუფლებინეს.

პარლამენტის სხდომათა დარბაზში ხმაური იყო. მედიისა და სამოქალაქო ორგანიზაციების წარმომადგენლები, „ნაციონალურ მოძრაობასთან“ ერთად, საკანონმდებლო ორგანოში მას შემდეგ შეიჭრნენ, რაც მთავრობისთვის მიცემული ულტიმატუმის ვადა 12:00 საათზე ამოიწურა. პარლამენტის შესასვლელთან დაწყებულმა ხმაურმა, მალევე, სხდომათა დარბაზში გადაინაცვლა.

ერთმანეთს დაუპირისპირდნენ დეპუტატებიც. სიტუაციის განმუხტვას მანდატურის სამსახური ცდილობდა. ამ პროცესების პარალელურად, ოპოზიციის წარმომადგენლებმა პარლამენტში, სპიკერისთვის განკუთვნილი ადგილიც დაიკავეს.

ოპოზიციის ნაწილი, მედიისა და სამოქალაქო ორგანიზაციების წარმომადგენლებთან ერთად, საქართველოს პრემიერის, ირაკლი ღარიბაშვილის გადადგომასა და რიგგარეშე არჩევნებს ითხოვს.