ვლადიმერ ბოჟაძე: შარლ მიშელის დოკუმენტმა ოპოზიციის ნაწილი „ნაცმოძრაობის“ ექვსთვიანი ტყვეობიდან იხსნა

ოპოზიციის ნაწილი „ნაცმოძრაობის“ ექვსთვიანი ტყვეობიდან იხსნა შარლ მიშელის დოკუმენტმა. ოთხი რაუნდი ჩატარდა ელჩების მონაწილეობით, იყო არაერთი ღია თუ დახურული შეხვედრა, ისმოდა ღია მოწოდებები პარლამენტში შესვლისკენ, იყო IRI-ისა და NDI-ის დასკვნები, თუმცა ისინი ვერ უძლებდნენ იმ წნეხს, ახლა კი გაუძლეს იმიტომ, რომ ამ პროცესის მიღმა იდგა შარლ მიშელი, - ამის შესახებ ტელეკომპანია „იმედის“ გადაცემაში „იმედის ფაქტორი“ ანალიტიკოსმა, ვლადიმერ ბოჟაძემ განაცხადა.

„ეს ყველა შემთხვევაში არის თანხმობის დოკუმენტი. ამ დოკუმენტის ხელმოწერით დასრულდა ბოიკოტირების, დაპირისპირების, პოლარიზაციის, ქუჩის აქციების ექვსთვიანი პროცესი. ეს დოკუმენტი განსხვავდებოდა დანიელსონის დოკუმენტისგან სწორედ ამ ორ ნაწილში. მართლმსაჯულების პოლიტიზების აღქმის ნაწილში არავის დარჩა სივრცე იმისათვის, რომ ხელი არ მოეწერა შეთანხმებისთვის. ამას ბეჭედი დაასვა საქართველოს პრეზიდენტმა, რომელმაც რურუას შეწყალების მზადყოფნა გამოთქვა. რას უწუნებენ ამ დოკუმენტს? მას აკლია რომელიმე ისეთი საკითხი, რომელიც მათ აწუხებდათ? ოპოზიციის ნაწილი, რომელსაც არ მოსწონდა არჩევნების შედეგები და ელოდებოდა ეუთოს დასკვნას, დოკუმენტზე ხელის მოწერით აღიარებენ, რომ არჩევნები არ გაყალბებულა. ეს ადამიანები „ნაცმოძრაობის“ ექვსთვიანი ტყვეობიდან გადაარჩინა შარლ მიშელის დოკუმენტმა. ოთხი რაუნდი ჩატარდა ელჩების მონაწილეობით, იყო არაერთი ღია თუ დახურული შეხვედრა, ისმოდა ღია მოწოდებები პარლამენტში შესვლისკენ, იყო IRI-ისა და NDI-ის დასკვნები, თუმცა ისინი ვერ უძლებდნენ იმ წნეხს, ახლა კი გაუძლეს იმიტომ, რომ ამ პროცესის მიღმა იდგა შარლ მიშელი. აქამდე რასაც ქუჩაში ვხედავდით, ახლა პარლამენტში დავინახავთ. ვინ თქვა, რომ პარლამენტში შესული დეპუტატები „ქართული ოცნების“ ქება-დიდებას დაიწყებენ? ამ დოკუმენტმა „ნაცმოძრაობა“ მარტო დატოვა. როდესაც ბრიუსელიდან და ვაშინგტონიდან გეუბნებიან, რომ პარლამენტში ცარიელი ადგილები არის რუსული თამაში, როდესაც საქართველოში ჩამოდის შარლ მიშელი, შენ კი ამ დროს ულტიმატუმებს აყენებ, ეს ნიშნავს, რომ შენი მიზანი არის მხოლოდ დესტაბილიზაცია და დესტრუქცია“, - განაცხადა ვლადიმერ ბოჟაძემ.