ლევან იოსელიანი: პოლიტიკური ფურცლის გადაშლა ნიშნავს იმას, რომ როდესაც ხელისუფლება შეიცვლება, 20 ივნისი ვიღაცის პოლიტიკური ანგარიშსწორების ინსტრუმენტი არ გახდება

ძალიან კარგია რაც მოხდა დღეს. დღეს ოპოზიციის მნიშვნელოვანი ნაწილი, პოლიტიკური ჯგუფების თვალსაზრისით უმრავლესობა, შემოვიდა პარლამენტში. ამან კიდევ ერთხელ დაადასტურა ის ფაქტი, რომ ნაბიჯი, რომელიც ჩვენ რამდენიმე თვის წინ გადავდგით, იყო სწორი და ზუსტად ვიცოდი, ეს დღე დადგებოდა და ოპოზიცია შემოვიდოდა პარლამნეტში, – ამის შესახებ პარლამენტის ვიცე-სპიკერმა, „მოქალაქეების“ წევრმა, ლევან იოსელიანმა „იმედის ფაქტორში“ ისაუბრა.

დეპუტატმა ასევე გაიხსენა ოპოზიციის ნაწილის უკმაყოფილება, როდესაც „მოქალაქეები“ პარლამენტში შევიდნენ. იოსელიანის თქმით, ეს დაუმსახურებელი გაკიცხვა იყო.

„პოლიტიკოსის ფასი არის იმაში, რომ მან შეძლოს გაბატონებული აზრის, მეინსტრიმის წინააღმდეგ მიიღოს გადაწყვეტილება, გადადგას ნაბიჯი და ბოლომდე დაიცვას თავისი გადაწყვეტილება“

მან ასევე ისაუბრა 20-21 ივნისის ამნისტიის საკითხზეც და აღნიშნა, რომ მიუხედავად განსხვავებებისა, მომზადებული კანონპროექტები პრინციპულად განსხვავებული არ არის და შარლ მიშელის შეთანხმების დოკუმენტის სულისკვეთებას მაინც ასახავს.

„გავაკეთეთ ყველაფერი, რომ ორი კანონპროექტი არ დარეგისტრირებულიყო და დარეგისტრირებულიყო ერთი კანონპროექტი. მთელი დისკუსია ეძღვნებოდა იმას, რომ მოდით, ახლა მაინც, შევეცადოთ ამ ნაწილში მაინც ვიყოთ ერთიანი. პოლიტიკური აქტი შედგა, შემოხვედით პარლამენტში და მოვძებნოთ რაღაც გადაკვეთის წერტილები. ბოლო 30 წლიანი ისტორიაში, პოლიტიკოსები მუდმივად ეძებდნენ სხვაობებს და ძალიან იშვიათად გადაკვეთის წერტილებს და დღეს, ჩვენ ვცდილობდით ეს გადაკვეთის წერტილები მოგვეძებნა. ვინც მოქალაქეებს სხეულის მძიმე დაზიანება მიაყენა, ამნისტია არ უნდა შეეხოთ, ამაზე ვთანხმდებით ყველა. 20 ივნისს შეცდომები დაუშვა ორივე მხარემ. ჩვენ დღეს ამაზე შევთანხმდით. მოდით ეს პოლიტიკური ფურცელი გადავშალოთ. პოლიტიკური ფურცლის გადაშლა ნიშნავს იმას, რომ როდესაც ხელისუფლება შეიცვლება, 20 ივნისი არ გახდეს ვიღაცის პოლიტიკური ანგარიშსწორების ინსტრუმენტი“, – განაცხადა ლევან იოსელიანმა.