იაგო ხვიჩია: შარლ მიშელის დოკუმენტი არ იყო მომგებიანი არც ხელისუფლებისთვის, არც ოპოზიციისთვის

ჩვენ და საქართველომ ზოგადად, ძალიან მნიშვნელოვანი დოკუმენტი მივიღეთ იმისთვის, რომ ცხოვრება თავიდან დავიწყოთ, ან სხვანაირად გავაგრძელოთ. შარლ მიშელის დოკუმენტი არ იყო მომგებიანი არც ხელისუფლებისთვის, არც ოპოზიციისთვის. ეს არის დოკუმენტი, საიდანაც დარესტარტება უნდა შეიძლებოდეს და ყველა ვალდებულია ამას დაემორჩილოს, - ამის შესახებ პარტია „გირჩის“ დეპუტატმა, იაგო ხვიჩიამ გადაცემა „იმედის ფაქტორში“ ისაუბრა.

„როდესაც ასეთი დოკუმენტი დგება და თანაც მაშინ, როდესაც ეუთოს დასკვნა არჩევნების გაყალბება არგაყალბებაზე არ არის ოპოზიციის სასარგებლო, როდესაც დიდხანს ამტკიცებდი რაღაცას და ამის მტკიცებულება არ გაქვს. ამ დროს მოდის დოკუმენტი, რომელშიც შენ შეიძლება ყველა პუნქტი არ მოგწონდეს ან არ მიგაჩნდეს რეალისტურად, მაგრამ 5%-იანი ბარიერი რომ 2%-მდე ჩამოდის, ეს ხომ ნამდვილად ასეა. 43% თუ ვერ აიღო „ქართულმა ოცნებამ“, ახალი არჩევნები რომ იქნება, ეს ხომ წერია დოკუმენტში. ბატონი გიორგი რურუა ხომ გარეთ არის დღეს, ამ დოკუმენტის მოქმედების შედეგად. მეც ნაკლებად მჯერა, მაგალითად სასამართლოს ნაწილის პერსპექტიულობის, პროკურატურის ნაწილის პერსპექტიულობის, მაგრამ თუნდაც საარჩევნო კანონმდებლობის თვალსაზრისით, ხომ არის წინ გადადგმული ნაბიჯი. მაშინ, როდესაც არჩევნების დამტკიცება არ დამტკიცება ასეთი ცხადი არ არის, შენ რომ ეს დოკუმენტი მიიღე და ხელს არ აწერ და ამბობ, რომ არ გამოხვალ ციხიდან ევროკავშირის გირაოს გადახდის გამო, კიდევ რაღაც გააკეთეთ და მეტად გამითვალისწინეთო. გამოდის, რომ ან ქვეყანამ უნდა იბრუნოს შენ ირგვლივ, ან ამ კონიუქტურას უნდა დაემორჩილო იმიტომ, რომ ეს არ არის შეურაცხმყოფელი კონიუქტურა. ოპოზიციას რომ ზეიმი დაეწყო და ეთქვა, რომ ჩენ გავიმარჯვეთ ამ დოკუმენტითო, უფრო გასაგები იქნებოდა ჩემთვის, ვიდრე ის, რომ ცხვირ-პირი ჩამოსტიროდათ წავაგეთო“, - განაცხადა იაგო ხვიჩიამ.