მამუკა მდინარაძე: მალე აღარავის ემახსოვრება ვინ რა დაგვაბრალა, ან რამდენჯერ გადათქვეს თავიანთი ნათქვამი, მაგრამ ევროპულ ოჯახში გაწევრიანება საქართველოს ისტორიის ყველაზე პოზიტიური ფურცელი იქნება

ჩვენ აქ პოლიტიკური კინკლაობით გავერთეთ და მთავარ პრობლემებზე ნაკლებად გადადის აქცენტი. ამ ქვეყნის მთავარი მიზანია საქართველო გახდეს ევროკავშირისა და ნატოს წევრი. ეს არის უალტერნატივო მიზანი, რომელიც თითოეული ადამიანის ცხოვრების უკეთეს პირობებსა და უფრო მაღალი ხარისხის დემოკრატიას ნიშნავს. ეს არის მთავარი საზრუნავი და ამასთან შედარებით სხვა ყველაფერი დეტალებია, - ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ პლენარული სხდომაზე განაცხადა.

მისი თქმით, შარლ მიშელის შეთანხმების დოკუმენტში ასახული ყველა კომპრომისი, რომელზეც მმართველი გუნდი წავიდა, მთავარ მიზანს - ევროკავშირში ინტეგრაციას ემსახურებოდა.

„მმართველი გუნდის წარმომადგენლები დამეთანხმებიან, რომ ძალიან ხშირად გვისვამენ შეკითხვას - რატომ ასეთი დონის კომპრომისები, რატომ აისახა კრიმინალური წარსულისა და აწმყოს მქონე ადამიანების შეთანხმების ტექსტში. აბსოლუტურად ლეგიტიმური შეკითხვაა. ეს გაკეთდა იმიტომ, რომ არ დავაზიანოთ ის მთავარი მზიანი, რომელზეც ვსაუბრობდი. საქართველო უნდა გახდეს ევროპული ოჯახის სრულუფლებიანი წევრი და ამ გზაზე სიარული მარტივი ნამდვილად არ არის და ეს ყველამ ვიცით. კომპრომისების გარეშე ეს არის წარმოუდგენელი. გარკვეული პერიოდის შემდეგ, საერთოდ არავის ემახსოვრება ვინ რა დაგვაბრალა, ან რამდენჯერ გადათქვეს თავიანთი ნათქვამი, რომელიღაც პარტიის ფორმალურმა თუ არაფორმალურმა კრიმინალმა ლიდერებმა, მაგრამ ევროპულ ოჯახში გაწევრიანება საქართველოს ისტორიის ყველაზე პოზიტიური ფურცელი იქნება. არსებობენ ამ ქვეყანაში ძალები, რომლებიც ამას ეროვნული ინტერესების დაკნინებასაც კი უკავშირებენ ხოლმე და ეს არის წმინდა რუსული პროპაგანდა, ისევე როგორ დეზინფორმაცია, რომელიც მძლავრად არის ბოლო პერიოდში. ყველას კარგად გვესმის, რომ სწორედ ევროპული ოჯახის წევრობაა ჩვენი ეროვნული იდენტობისა და გადარჩენის ყველაზე მყარი გარანტია“, - განაცხადა მამუკა მდინარაძემ.