სამინისტრო: შენობა, რომელზეც ნიჭიერთა ათწლედის ყოფილი ხელმძღვანელი ცრუ ინფორმაციას ავრცელებს, რეალურად, სასწავლებელს არასდროს ეკუთვნოდა

საქართველოს კულტურის, სპორტისა და ახალგაზრდობის სამინისტრო ეხმიანება ზაქარია ფალიაშვილის სახელობის ცენტრალური სამუსიკო სკოლის - „ნიჭიერთა ათწლედის" ყოფილი ხელმძღვანელის, თამარ შენგელიას მიერ სოციალური ქსელის მეშვეობით გავრცელებულ ინფორმაციას იმასთან დაკავშირებით, თითქოს „მისი და ნიკა რურუას ძალისხმევით ნიჭიერთა ათწლედისათვის გადაცემული შენობა სასწავლებელს ჩამოართვეს“.

„ქალბატონი თამარ შენგელია სასწავლებელს 2013 წლის ივნისამდე ხელმძღვანელობდა. სინამდვილეში კი, იმ შენობაში, რომელზეც სასწავლებლის ყოფილი ხელმძღვანელი „წუხს“, ნიჭიერთა ათწლედს ერთი დღეც კი არ უმუშავია. ჩხეიძის ქუჩა N8-ში მდებარე შენობა სასწავლებელს 2012 წლის აგვისტოში გადაეცა. თუმცა, სწორედ სასწავლებლის მაშინდელი დირექტორის - თამარ შენგელიასა და კულტურის სამინისტროს უყურადღებობის გამო, შენობაში 2012 წლის 2 ოქტომბერს თვითნებურად შეიჭრნენ იძულებით გადაადგილებული პირები - 80-მდე ოჯახი. როგორც ცნობილია, „ქართული ოცნების“ მთავრობის შემადგენლობა მხოლოდ 25 ოქტომბერს დამტკიცდა. ამ თარიღამდე კი, შენობის დაცვა და მოვლა-პატრონობა სწორედ ქალბატონ თამარ შენგელიას ევალებოდა. ამის ნაცვლად, სასწავლებლის ხელმძღვანელობა ცრუ დაპირებებს აძლევდა აღსაზრდელებს, თითქოს ისინი უახლოეს პერიოდში შეძლებდნენ შენობაში შესვლასა და სწავლას. რეალურად კი, ეს შეუძლებელი იყო, ვინაიდან შენობაში 80 ოჯახი ცხოვრობდა. ამასთან, სასწავლებლისთვის გადაცემული შენობა სრულ რეაბილიტაციას საჭიროებდა, რისთვისაც რამდენიმე მილიონი ლარი იყო საჭირო. ცხადია, ეს სასწავლებლის მაშინდელმა ხელმძღვანელობამაც იცოდა, მაგრამ ისინი დაპირებებით კვებავდნენ აღსაზრდელებს“, - აღნიშნულია სამინისტროს განცხადებაში.

კულტურის, სპორტისა და ახალგაზრდობის სამინისტრო განმარტავს, რომ თამარ შენგელიას მიერ სოციალურ ქსელში გავრცელებული ინფორმაცია არის საზოგადოების შეცდომაში შეყვანის მცდელობა.

„ქალბატონ თამარს კარგად მოეხსენება, რომ შენობაში, მისივე დაუდევრობის გამო, აღსაზრდელებს რეალურად არასდროს უსწავლიათ. კულტურის ახლადშექმნილ სამინისტროს მიაჩნია, რომ რაკი არ არსებობს ქალბატონი თამარ შენგელიას ხელმძღვანელობისას შენობაში შეჭრილი 80-მდე ოჯახის განსახლების გეგმა, სამინისტროს არ აქვს უფლება, ცრუ დაპირებები მისცეს მოსწავლეებს. კულტურის სამინისტრომ გადაწყვიტა, რომ შენობა, რომელშიც რამდენიმე ათეული ოჯახი ცხოვრობს, დაუბრუნდეს სახელმწიფოს, როგორც ნიჭიერთა ათწლედისათვის გამოუსადეგარი და აღსაზრდელებისთვის გამოიძებნოს სხვა, თავისუფალი შენობა. აქვე საზოგადოებას შევახსენებთ, რომ ქალბატონ თამარ შენგელიასათვის საქებარი წინა ხელისუფლების პერიოდში, 2006 წელს, ნიჭიერთა ათწლედს ჩამოერთვა მის საკუთრებაში არსებული შენობა თბილისში, ზუბალაშვილის ქუჩა N42-ში, რომელიც გასხვისდა. სწორედ ამის შემდეგ დარჩა სასწავლებელი შენობის გარეშე და სამუსიკო სახელოვნებო განათლება დაყენებულ იქნა რეალური საფრთხის წინაშე“, - აცხადებს სამინისტრო.

უწყება განმარტავს, რომ ამჟამად, საქართველოს კულტურის სამინისტროს მიზანი ამ მრავალწლიანი პრობლემის 2021 წლის ბოლომდე გადაჭრაა, რაც დიდი გამოწვევაა.