თეა წულუკიანი: ჩვენ იმ ეპოქაში ვართ, როდესაც საქართველოს პოლიტიკოსი ქალები არიან ყველაზე ძლიერები, ვიდრე ოდესმე

ჩვენ ალბათ იმ ეპოქაში ვართ, როდესაც საქართველოს პოლიტიკოსი ქალები არიან ყველაზე ძლიერები, ვიდრე ოდესმე. ეს შეიძლება თამამად ითქვას. თუ თქვენ შეხედავთ სამთავრობო და აღმასრულებელ სტრუქტურებს, პარლამენტს. „ქართული ოცნების“ ხელისუფლების მიერ გაკეთებული საქმეების შედეგად დღეს ქართულ პოლიტიკაში ქალები არიან გაცილებით უფრო ძლიერები, ვიდრე ოდესმე ყოფილან, - ამის შესახებ საქართველოს კულტურის, სპორტისა და ახალგაზრდობის მინისტრმა თეა წულუკიანმა „ქრონიკაში“ განაცხადა.

„ჩვენ, 103 წლის წინ ვიყავით სამაგალითო ქვეყანა და ზუსტად 100 წლის წინ, როდესაც ჩვენ კონსტიტუცია მივიღეთ, იქ ჩაიწერა ბევრი მაშინდელი ევროპული თუ ამერიკელი ქვეყნისთვის შესაშურად, რომ ქართველ ქალებს აქტიური არჩევნების უფლებაც ჰქონდათ. ჩვენ გვყავდა 5 დეპუტატი ქალი, როდესაც სხვა დაწინაურებულ ქვეყნებში ქალები პიკეტებს აწყობდნენ და ქვების სროლით იბრძოდნენ იმისთვის, რომ ვინმეს მათთვის ხმის უფლება მიეცათ.

ეს ქვეყანა ვართ ჩვენ, ეს ტრადიცია გრძელდება და მეამაყება, რომ ჩვენი ხელისუფლების პირობებში მოეწერა „ქალთა წინააღმდეგ ძალადობის აღმოფხვრის შესახებ ევროპულ კონვენციას“ ხელი. ამის შემდეგ უამრავი რეფორმა გატარდა ქალთა დასაცავად. მინდა, დღევანდელი დღე, 26 მაისი იმ ქალებს მივულოცო, ვინც მაინც არიან ძალადობის მსხვერპლნი და ხმა ამოიღონ, რათა ხმის ამოღებისა და ბრძოლის გარეშე არასდროს არ ხდება უფლებების დაცვა. დღეს სახელმწიფო და კანონი არის უფრო მეტად მზად, რომ თუკი ძალადობის მსხვერპლი გოგონა, ქალი ხმას ამოიღებს ის იყოს დაცული. ამიტომ დღეს ალბათ, ის 26 მაისია, როდესაც ქართველი ქალები ყველაზე ძლიერები არიან, მაგრამ ბევრი სამუშაოა, იმისთვის, რომ ჩვენ ვიყოთ რეალურად თანასწორნი.

11 წელი შესრულდა ამ წლის მაისში, რაც პოლიტიკაში ვარ ჩართული და მინდა გითხრათ, რომ ეს არ იყო მარტივი გზა და მე მინდა პატარა გოგონებს, ვინც დღეს მისმენს და უნდათ პოლიტიკაში ჩართვა, ვუსურვო, რომ როდესაც ჩემ ადგილას იქნება, ქალი კულტურის მინისტრი, მან იგივე არ თქვას, რომ ჩემთვის პოლიტიკაში ყოფნა რთული გზა იყოო. აი, ასე მინდა ქართველ გოგონებს დღევანდელი დღე მივულოცო“, - განაცხადა თეა წულუკიანმა.

26 მაისს საქართველო დამოუკიდებლობის დღეს ზეიმობს.