გიორგი გახარიამ პოლიტიკური გაერთიანება ოფიციალურად დააფუძნა

საქართველოს ყოფილმა პრემიერ-მინისტრმა, გიორგი გახარიამ პოლიტიკური გაერთიანება „საქართველოსთვის“ ოფიციალურად დააფუძნა. სადამფუძნებლო კონფერენციაზე შეკრებილებმა გაერთიანების ხელმძღვანელად გიორგი გახარია აირჩიეს.

პარტიაში აცხადებენ, რომ ყველა პოლიტიკურ პროცესში, მათ შორის, არჩევნებშიც, აქტიურად ჩაერთვებიან.

„ვერთიანდებით საქართველოსთვის, მაგრამ - არავის წინააღმდეგ. დღეს ჩვენი გუნდი იწყებს პოლიტიკურ პროცესებში აქტიურად ჩართვას - საქართველოსთვის. ბოლო პერიოდში, საზოგადოებასთან ერთად, თვალყურს ვადევნებთ პოლიტიკურ პროცესებს. ჩემთვის, და დარწმუნებული ვარ, საქართველოს ბევრი მოქალაქისთვის, აბსოლუტურად ნათელია, რომ დღეს საქართველოს სჭირდება გუნდი, რომელსაც შეუძლია, სიმართლეს თვალი გაუსწოროს, გუნდი, რომელსაც შესწევს უნარი, სიმართლე უთხრას საქართველოს მოქალაქეს; უთხრას სიმართლე იმ გამოწვევებზე, რომლის წინაშეც ქვეყანა დგას და, რაც მთავარია, მოქალაქეებთან ერთად, მათი ჩართულობით, ქვეყანას წესრიგი შესთავაზოს, ოღონდ - სამართლიანი წესრიგი. სამართლიანი წესრიგი არის ის სივრცე, რომელშიც, ყველას ერთად, შეგვეძლება, ჩვენი შესაძლებლობების შესაბამისად, ვემსახუროთ ჩვენს სამშობლოსა და სახელმწიფოს. ყველას კარგად უნდა გვესმოდეს, რომ სიმართლის ძალა მდგომარეობს იმაში, რომ არ უნდა ვიცხოვროთ ილუზიაში. ხანდახან, პოლიტიკური კულტურა, პოლიტიკური ველი გვაცხოვრებს ამ ილუზიაში, მაშინ, როდესაც პოლიტიკურ ძალებს, პარტიებს შორის კინკლაობა, ჩხუბი, შეიძლება, ვიღაცას ქვეყნისთვის პროგრესის მომტანი ჰგონია. არა, სინამდვილეში, კარგ შემთხვევაში, ჩვენ ერთ ადგილს ვტკეპნით, ცუდ შემთხვევაში - ქვეყანა იხევს უკან. ყველას უნდა გვესმოდეს, რომ ჩვენს გასაკეთებელს არავინ და ვერავინ ვერ გააკეთებს, მიზნების მისაღწევად, ხშირად, ბევრი საშრომი და მძიმე გადაწყვეტილებებიც გვექნება მისაღები. ამიტომ, ჩვენ ვერთიანდებით საქართველოში და, პირველ რიგში, იმისთვის, რომ ყველამ ერთად ავაშენოთ ძლიერი სახელმწიფო. ნებისმიერი ჩვენი ახალი ხელისუფლება, პირველი რასაც აკეთებდა, დაბეჯითებით ანგრევდა მისი წინამორბედის დატოვებულ შთამომავლობას. იმისდა მიუხედავად, რამდენად გონივრული, ან კარგი იყო ეს შთამომავლობა. ყველას კარგად უნდა გვესმოდეს, რომ ეს იყო ყველაზე ძირითადი მიზეზი, ქვეყნის ერთ ადგილზე დგომის. ჩავთვალოთ, რომ ჩვენ, ყველანი ვაშენებთ სახლს, ჩავთვალოთ, რომ თითოეული ხელისუფლების ვალდებულებაა, ერთი სართული მაინც დააშენოს ჩვენი წინაპრების დატოვებულ ფუნდამენტს. ამ შემთხვევაში, ყველას კარგად უნდა გვესმოდეს, რომ ნებისმიერი ახალი ხელისუფლება, ყველანაირი გონივრულობის ფარგლების მიღმა, როდესაც იწყებს ნგრევას წინამორბედის დატოვებული შთამომავლობის, რა თქმა უნდა, ქვეყანას განვითარების პერსპექტივას უსპობს. ჩვენ იმის ტყვეობაში ვრჩებით, რომ უნდა ვიცხოვროთ მხოლოდ ერთსართულიან ქვეყანაში, ცათამბრჯენების ეპოქაში. რა თქმა უნდა, ეს ჩვენთვის მიუღებელია. ყველანი ერთად უნდა შევთანხმდეთ, რომ უნდა გავერთიანდეთ განახლებისთვის. განახლებისთვის, რომელიც ყველაფერ ცუდს ეტყვის უარს, მაგრამ გაითვალისწინებს ყველაფერს კარგს, ყველა იმ თითოეულ აგურს, ჩვენი ქვეყნის შენებაში, რომელიც შეიძლება ჩვენი მოქალაქეებისთვის, მომავლისთვის იყოს საჭირო“, - თქვა გიორგი გახარიამ ღონისძიებაზე სიტყვით გამოსვლისას.

გიორგი გახარიას მიერ პოლიტიკური გაერთიანების დაფუძნების პარალელურად, „ექსპო ჯორჯიასთან“ საპროტესტო აქცია იმართება. მოძრაობა „შეცვალე“ და მოძრაობა „საქართველოსთვის“ გახარიას პოლიტიკაში დაბრუნებას აპროტესტებენ. აქციის მონაწილეები აცხადებენ, რომ გიორგი გახარიას მისამართით ბევრი კითხვა არსებობს, რომელთაც პასუხი უნდა გასცეს. ცოტა ხნის წინ, ადგილზე ინციდენტსაც ჰქონდა ადგილი - აქციის მონაწილეებმა პრეზენტაციაზე შესვლა სცადეს.

მმართველ გუნდში ამბობენ, რომ გახარიას პარტია არ იქნება მათი რეალური კონკურენტი, რომელსაც შეუძლია, გავლენა იქონიოს ამომრჩევლის პარტიულ განწყობებზე. მათივე თქმით, გიორგი გახარიასთვის „ქართულ ოცნებასთან“ კონკურენცია რთული იქნება, რადგან მას გაუჭირდება „ქართული ოცნების“ მმართველობის პერიოდის გაკრიტიკება, ვინაიდან ის თავად იყო ამ პარტიის ერთ-ერთი ლიდერი.

რადიკალურ ოპოზიციაში კი ამბობენ, რომ „კარგი იქნება, თუ გახარია ხმებს წაართმევს და „ქართული ოცნება“ 43%-ს ვერ გადალახავს“.

გიორგი გახარიამ პრემიერ-მინისტრის თანამდებობა 18 თებერვალს დატოვა.