გურამ მაჭარაშვილი: გიორგი გახარიას მხრიდან იმ პრობლემებზე საუბარი, რომლის ავტორი თვითონ იყო, მინიმუმ უხერხულია

არაერთხელ გვითქვამს, რომ პოლიტიკაში დაბრუნება გიორგი გახარიასთვის ნამდვილად არ იქნებოდა მარტივი. როგორც ხედავთ, ასეც არის, – ამის შესახებ საპარლამენტო უმრავლესობის წევრმა, გურამ მაჭარაშვილმა განაცხადა.

მაჭარაშვილი გამოეხმაურა გიორგი გახარიას შესახებ „ქართული ოცნების“ თავმჯდომარის, ირაკლი კობახიძის განცხადებას და აღნიშნა, რომ გიორგი გახარიასთვის რთულია მოიპოვოს ოპოზიციონერის სტატუსი და ამასთანავე, ყოფილ პრემიერთან მიმართებაში ბევრი კითხვა გროვდება არამხოლოდ ოპოზიციისგან და ხალხისგან, არამედ უკვე „ქართული ოცნებისგანაც“.

„ყველას აქვს უფლება, პოლიტიკაში დაბრუნდეს, მაგრამ გახარია იყო მაღალი თანამდებობის პირი, „ქართული ოცნების“ ლიდერი, რამე გადაწყვეტილება თუ იყო მიღებული, მისი მითითებებით ხდებოდა და დღეს მისი მხრიდან საუბარი იმ პრობლემებზე, რომლის ავტორი თვითონ იყო, როგორც მინიმუმ უხერხულია. დღეს, როგორც ვამჩნევთ, არამხოლოდ უხერხულობასთან გვაქვს საქმე, არამედ სერიოზულ საკითხებთან დაკავშირებით მან პასუხები უნდა გასცეს. რაც შეეხება იმას, ინფორმაცია საიდან გვაქვს და ა.შ., ბუნებრივია, მმართველ პარტიაში მიმდინარეობს კონსულტაციები და გვაქვს ჩვენი ურთიერთობები. აქედან გამომდინარე, ჩვენ როგორც ირაკლი კობახიძემ განაცხადა, ფაქტებიდან გამომდინარე გარკვეულ დასკვნებს ვაკეთებთ. ეს არ არის სამართლებრივი საკითხი, ეს არის პოლიტიკური პროცესი და ჩვენ ფაქტებიდან გამომდინარე ვაკეთებთ დასკვნებს. დასკვნები და შეფასებები საზოგადოებამ უნდა გააკეთოს, ჩვენ კი ვაწვდით ინფორმაციას. როდესაც გახარიამ დატოვა თანამდებობა, თავიდანვე ვამბობდით, რომ ეს იყო საკმაოდ გაუგებარი ჩვენთვის და მან ეს თავადაც დაამტკიცა. მაშინ, როდესაც მართლმსაჯულების გადაწყვეტილება უნდა აღსრულდეს და პრემიერი იჩენს სისუსტეს, მიმაჩნია, რომ ეს არის ურთიერთგამომრიცხავი ფაქტები და ის თავად უწყობდა ხელს შესუსტებას. აქედან გამომდინარე, მისი გზავნილები, რომ ეს სახელმწიფო ინსტიტუტების სისუსტეა, როგორც მინიმუმ კითხვის ნიშნებს ბადებს“, – განაცხადა გურამ მაჭარაშვილმა.

„ქართული ოცნების“ თავმჯდომარის, ირაკლი კობახიძის განცხადებით, კიევიდან მათ შეატყობინეს, რომ „ნაცმოძრაობას“ ხელისუფლების აყირავების გეგმის სისრულეში მოყვანისთვის 2 დღე სჭირდებოდა, და სწორედ 2 დღით ითხოვდა გიორგი გახარია ნიკა მელიას დაკავების გადადებას, რაც საეჭვოდ დაემთხვა ერთმანეთს.