არჩილ თალაკვაძე: რაშიც გეკუთვნით ეგ დაფინანსება, ან შეასრულეთ ის საქმე ან გამოდით და პირდაპირ თქვით - არ გინდათ სახელმწიფო, კანონი, დემოკრატიული სისტემა

თქვენ გინდათ, სწორედ ფული წაართვათ მოქალაქეებს, თან მათ ხარჯზე ქუჩაში გქონდეთ ხმაური, დესტაბილიზაცია და ამაში 6 მლნ გადაახდევინოთ, - ამის შესახებ პარლამენტის ვიცე-სპიკერმა არჩილ თალაკვაძემ პლენარულ სხდომაზე პარტიების დაფინანსების შესახებ კანონპროექტის განხილვისას განაცხადა.

თალაკვაძემ მიმართა ოპოზიციას ბოიკოტსა და პოლიტიკურ საბოტაჟს ერთმანეთში ნუ აურევენ.

„აქ ერთ-ერთი ოპოზიციური ლიდერის კომენტარი იყო - თქვენ, რომ პასუხისმგებლიანი პარტია იყოთ, იზრუნებდით, პარლამენტში ბევრი პარტია შესულიყოო. სირცხვილია, როდესაც ასეთ კომენტარს აკეთებს პარტია, რომელმაც ბოლო წლები ს განმავლობაში არცერთ ფუნდამენტურ დემოკრატიულ ცვლილებას მხარი არ დაუჭირა. შეგახსენებთ, რას დაუწირეთ მხარი: საკონსტიტუციო ცვლილებებს, რომლითაც ქვეყანა საპარლამენტო მმართველობაზე გადავიდა. როდესაც საარჩევნო კოდექსი შევცვალეთ. ჩვენ განვახორციელეთ რეფორმები და არცერთმა პარტიამ მხარი არ დაუჭირეთ.

თქვენი ლოგიკა რომ ორ მეტრზე იქეთ არ მიდის, ეგ მინდა აგიხსნათ ზოგზოგიერთებს. მოქალაქეებს ფულს კი არ ვართმევთ, თქვენ გინდათ, სწორედ ფული წაართვათ მათ, თან მათ ხარჯზე ქუჩაში გქონდეთ ხმაური, დესტაბილიზაცია და ამაში მოქალაქეებს 6 მლნ გადაახდევინოთ. რაშიც გეკუთვნით ეგ დაფინანსება, ან შეასრულეთ ის საქმე ან გამოდით და პირდაპირ თქვით, არ გინდათ სახელმწიფო, კანონი, დემოკრატიული სისტემა. ბრტყელ-ბრტყელი განცხადებებით გინდოდათ ფონს გასულიყავით და ამ ქვეყანაში რევოლუცია მოგეწყოთ. არ გამოგივიდათ, რადგან ეს 2003 წელი არ არის, სხვა სახელმწიფოა. ბოიკოტსა და პოლიტიკურ საბოტაჟს ერთმანეთში ნუ აურევთ. ეს სულ სხვადასხვაა და ჩვენს ევროპარლამენტარ კოლეგებს რომ დავესესხოთ, ძირს უთხრიდით ქართულ დემოკრატიას. ეს კანონი ემსახურება იმას, რომ მომავალში ჩვენს დემოკრატიას ძირი არავინ გამოუთხაროს“, - განაცხადა თალაკვაძემ.

საპარლამენტო ოპოზიცია პარტიების დაფინანსებასთან დაკავშირებით საკანონმდებლო პაკეტს მხარს არ უჭერს და აცხადებს, რომ აღნიშნული ინიციატივა არადემოკრატიულია.