გიტანას ნაუსედა: ლიეტუვის ოფიციალური პოზიციაა, რომ ხელი შეუწყოს პარტიებს შორის დიალოგს

„ჩვენ პარლამენტში 141 წევრი გვყავს. მათ საკუთარი, განსხვავებული პოზიციები აქვთ, მაგრამ ლიეტუვის ოფიციალური პოზიციაა, რომ ხელი შეუწყოს პარტიებს შორის დიალოგს“, - ასე გამოეხმაურა საქართველოს პარლამენტში მისული ლიეტუვის პრეზიდენტი, გიტანას ნაუსედა ლიეტუვის საგარეო საქმეთა კომიტეტის თავმჯდომარის, ჟიგიმანტას პავილიონისის განცხადებას.

მისივე თქმით, მხარეთა შორის უთანხმოება უცხო არაა, თუმცა, ორივე მხარისთვის პრიორიტეტი დიალოგის მიღწევა უნდა იყოს.

„მე მქონდა შესანიშნავი შესაძლებლობა, პოლიტიკურ მაგიდასთან მომესმინა მმართველი ძალისა და ოპოზიციის პოზიციები. ჩემი კითხვა იყო, შეუძლიათ თუ არა, გამონახონ საერთო სფეროები, რომლებიც მნიშვნელოვანია ქვეყნისა და ხალხისთვის. მათ თქვეს „კი“, რადგან საერთო ინტერესის სფეროა ევროკავშირსა და ნატოში გაწევრიანება და ამ მიმართულებით, განსხვავებული აზრი არ აქვთ. ჩვენ უნდა ვიფიქროთ იმაზე, თუ როგორ დავაახლოვოთ პოლიტიკური პარტიები ერთმანეთთან, რათა გამოვნახოთ საჭირო პოლიტიკური ენერგია და წავიდეთ წინ. ესაა ყველაზე მნიშვნელოვანი. უთანხმოება, გაუგებრობა ყოველთვის იქნება, მაგრამ ჩვენ ეს ყველაფერი უნდა გავმიჯნოთ იმისგან, რაც ყველაზე მნიშვნელოვანია“, - აღნიშნა ლიეტუვის პრეზიდენტმა.

ლიეტუვის სეიმის საგარეო ურთიერთობათა კომიტეტის თავმჯდომარემ, ჟიგიმანტას პავილიონისმა განაცხადა, რომ საქართველოში ბიძინა ივანიშვილის წინააღმდეგ თავისი ომი აქვს. ამის შესახებ ჟიგიმანტას პავილიონისმა რუს პრანკერებთან, ვოვანთან და ლექსუსთან ილაპარაკა.

ლიეტუვის პრეზიდენტმა ოფიციალური შეხვედრები სალომე ზურაბიშვილთან აუდიენციით დაიწყო, რის შემდეგაც მთავრობის მეთაურს შეხვდა. ლიეტუვის პრეზიდენტი შეხვედრას გამართავს პარლამენტის თავმჯდომარესთან. დაგეგმილია სტუმრობა საპატრიარქოში ილია მეორესთან. ასევე, ვიზიტის ფარგლებში, ლიეტუვის პრეზიდენტი საქართველოს ერთიანობისათვის დაღუპულ გმირთა მემორიალს გვირგვინით შეამკობს. ოფიციალურ შეხვედრებამდე კი, ნაუსედა საოკუპაციო ხაზთან იმყოფებოდა.