ირაკლი ქადაგიშვილი: მოსამართლეებს საპარლამენტო ფილტრი აქვთ გასავლელი, მერწმუნეთ, პარლამენტი იმ კანდიდატურებს დაუჭერს მხარს, ვინც ღირსი იქნება

წარდგენილ მოსამართლეობის კანდიდატურებს აქვთ გასავლელი საპარლამენტო ფილტრი, მერწმუნეთ პარლამენტი იმ კანდიდატურებს დაუჭერს მხარს, ვინც ამის ღირსი იქნება,- ამის შესახებ საპაროცედურო საკითხთა და წესების კომიტეტის თავმჯდომარე ირაკლი ქადაგიშვილმა განაცხადა.

როგორც ქადაგიშვილი განმარტავს, მათ უკვე შეასრულეს ვენეციის კომისიის რეკომენდაციები და კანდიდატურების შერჩევა ახალი წესებით მოხდა.

„ჩვენ მაქსიმალურად ვცდილობთ საერთაშორისო პარტნიორებთან ერთად პუნქტობრივად, საგნობრივად, ჩვენი კონსტიტუციისა და კანონმდებლობის შესაბამისად, ყველა საკითხს ნაბიჯ-ნაბიჯ მივყვეთ. ჩვენ რაც შარლ მიშელის დოკუმენტში იყო ასახული და ქალბატონ ელჩთანაც იყო მანამდეც და შემდგომაც კომუნიკაცია, პუნქტობრივად იქნა მიწოდებული ჩვენეული ხედვა, რომ შარლ მიშელის დოკუმენტში ასახული და მათ შორის, ვენეციის კომისიის რეკომენდაციები, რომელიც გვაქვს მიღებული, ფაქტობრივად ყველა ეს რეკომენდაცია და იმ დოკუმენტში ჩაწერილი, ყველა პუნქტი შესრულებული გვაქვს, მათ შორის, წარდგენის წესი, უზენაესი სასამართლოს ფორმირების წესი და დამატებითი დრო, რომ ახალი წესებიდან გამომდინარე, დამატებით საშუალება მისცემოდათ ყველა მსურველს, დამატებით წარმოედგინათ თავიანთი კანდიდატურები, გამომდინარე აქედან, ჩვენ მართლაც ბუკვალურად გავყევით ამ დოკუმენტის სულისკვეთებას და ჩვენი ქვეყნის კანონებს და ამ პროცესით მოხდა მოსამართლეთა წარდგენა. ამ წარდგენილ მოსამართლეებს აქვთ გასავლელი საპარლამენტო ფილტრი, მერწმუნეთ პარლამენტი იმ კანდიდატურებს დაუჭერს მხარს, ვინც ამის ღირსი იქნება. პარლამენტში იქნება ამაზე მსჯელობა, დებატები, თითოეულ დეპუტატს ექნება შესაძლებლობა კითხვები დაუსვას თითოეულ კანდიდატს და შემდეგ მიიღოს ყველამ ინდივიდუალური გადაწყვეტილება. ამ შემთხვევაში, გარდა პარტიული და ფრაქციული დისციპლინისა მნიშვნელოვანი იქნება თითოეული დეპუტატის პასუხისმგებლობა, ამიტომ ჩვენ ჩვენი პარტნიორების ყველა შენიშვნას გაფრთხილებას გამოთქმულ წინადადებას ყურადღებით ვიღებთ, ვუსმენთ და ამის გათვალისწინებით და ჩვენი ქვეყნის კანონმდებლობიდან და იმ ინტერესიდან გამომდინარე, რომ მოსახლეობას უნდა სწრაფი და სამართლიანი სამართლის აღსრულება იხილოს, ჩვენ ამ პროცესს გეგმაზომიერად ვახორციელებთ და მივდევთ,“- განაცხადა ქადაგიშვილმა.