არასამთავრობოები პეკინის ქუჩაზე ცალმხრივი მოძრაობის დაწესებას აპროტესტებენ

არასამთავრობო ორგანიზაციები თბილისის მერიას მიმართავენ პეკინის ქუჩაზე არ მოხდეს ცალმხრივი მოძრაობის დაწესება.

„სხვადასხვა ქვეყნის ქალაქების გამოცდილებიდან ცნობილია, რომ განიერ ქუჩაზე ცალმხრივი მიმართულების დაწესების შემდეგ იმატებს ავტომობილების რაოდენობა, სიჩქარე, და ინტენსივობა, ისევე როგორც იზრდება ხმაური, ვიბრაცია და ჰაერის დაბინძურების დონე, ხოლო ტროტუარებზე მცირდება ქვეითების რაოდენობა. პეკინის ქუჩა ქალაქში ერთ-ერთი ყველაზე დატვირთული და ცოცხალი ქუჩაა. მოსალოდნელია, რომ დაგეგმილი ცვლილები უარყოფითად იმოქმედებს არა მხოლოდ ქუჩის მაცხოვრებლებსა და ქვეითებზე, არამედ მასზე განლაგებულ ბიზნეს ობიექტებზეც.

ქალაქების დაგეგმარების მსოფლიოში აღიარებული პრინციპების გათვალისწინებით, ურბანულ ზონებში მჭიდროდ დასახლებულ, დატვირთულ და განიერ ქუჩებზე პრიორიტეტი უნდა გახდეს საფეხმავლო ზონების გაფართოება, უსაფრთხოების კუნძულების მოწყობა, სწრაფი ავტობუსების ხაზის გამოყოფა და ავტობუსების გაჩერებების მოწყობა. ასეთ ქუჩებზე მაქსიმალურად იზღუდება პარკირება და ის ფასიანია“,- ნათქვამია განცხადებაში.

არასამთავრობო ორგანიზაციები ასევე ხაზს უსვამენ, რომ მსგავსი გადაწყვეტულების მისაღებად აუცილებელია განივი კვეთის ქუჩებში და მიმდებარე ტერიტორიებზე მცხოვრები ადამიანების, როგორც ქვეითების, ისე მძღოლების გადაადგილების შესაძლო მარშრუტების სიღრმისეული ანალიზი. ასევე მნიშვნელოვანია, მოხდეს აღნიშნული ცვლილების ტრანსპორტის მოდელირების პროგრამით შესწავლა.

განცხადებას ხელს მოძრაობის უსაფრთხოების საკითხებით დაინტერესებული არასამთავრობო ორგანიზაციები აწერენ, მათ შორის „არასამთავრობო ორგანიზაციების გლობალური ალიანსი უსაფრთხო მოძრაობისთვის“.

გუშინ პეკინისა და შარტავას ქუჩებზე ცალმხრივი მოძრაობის შესაძლო დაწესებასთან დაკავშირებით, საზოგადოებრივი აზრის გამოკითხვა თბილისის მერიის ეკონომიკური განვითარების საქალაქო სამსახურმა დაიწყო.

ქუჩის გაცალმხრივებასთან დაკავშირებით, ქალაქის მერმა განცხადება უკვე გააკეთა. დავით ნარმანიას თქმით, პეკინის გამზირის ცალმხრივად დატოვების შესახებ პოლიტიკური გადაწყვეტილება უკვე მიღებულია. ნარმანიას თქმით, ამ ეტაპისთვის, შესაბამისი გაანგარიშებები და მარშუტების დაზუსტდება მიმდინარეობს.

დაგეგმილი სარეაბილიტაციო სამუშაოების გამო, პეკინის ქუჩა ცალმხრივად გადაიკეტა არქივიდან სასტუმრო holiday inn-ის ჩათვლით. სამუშაოები 24-საათიან რეჟიმში მიმდინარეობს და სავარაუდოდ, 10 სექტემბრამდე დასრულდება.