ლაშა დარსალია ჟენევის რაუნდზე: გახელაძისა და ბებუას თემა არის მთავარი, როდესაც დაკავებების საკითხს ვეხებით

არ მინდა, მოვლენებს წინ გავუსწრო, მაგრამ სიმართლე გითხრათ, გარკვეული ოპტიმიზმის საფუძველი მაქვს, განსაკუთრებით დღევანდელი დღის შემდგომ, - ამის შესახებ საგარეო საქმეთა მინისტრის მოადგილემ, ლაშა დარსალიამ ჟენევის მოლაპარაკებების მორიგი რაუნდის დასრულების შემდეგ, გახელაძის საკითხზე საუბრისას ჟურნალისტებს განუცხადა.

იგი იმედოვნებს, რომ მოლაპარაკებების შდეგად ჰუმანიტარული საკითხების პოლიტიკურისგან გამიჯვნა შესაძლებელი იქნება, თუმცა დარსალია კონკრეტულ დეტალებზე ჯერ არ საუბრობს.

„საკმაოდ რთული მოლაპარაკებათა პროცესი იყო, მათ შორის ჰუმანიტარულ საკითხებზე. ბატონი გახელაძის, ბატონი ბებუას თემები არის მთავარი, როდესაც დაკავებების საკითხს ვეხებით. არ მინდა, მოვლენებს წინ გავუსწრო, მაგრამ სიმართლე გითხრათ, გარკვეული ოპტიმიზმის საფუძველი მაქვს, განსაკუთრებით დღევანდელი დღის შემდგომ.

ვფიქრობ, შესაძლებელი იქნება ჰუმანიტარული საკითხების პოლიტიკურისგან გამიჯვნა და ჰუმანიტარულ ჭრილში გარკვეული პროგრესის მიღწევა. სამწუხაროდ, დეტალებზე ჯერ ვერ ვისაუბრებ, მაგრამ იმედი გვაქვს, რომ ჰუმანიტარულ ჭრილში ამ საკითხების გადაჭრა შესაძლებელი იქნება. ჰუმანიტარულ ჭრილში ნიშნავს იმას, რომ სამწუხაროდ, ჩვენ გვაქვს რეალობა, როდესაც ჰუმანიტარული საკითხების პოლიტიზება ხდება, რაც კიდევ უფრო ართულებს-ხოლმე ამ შემთხვევებს, თუმცა დღევანდელი მოლაპარაკების შემდეგ არის მოლოდინი, რომ ჰუმანიტარული საკითხები პოლიტიკურისგან გაიმიჯნება“, - განაცხადა დარსალიამ.

ოკუპანტებმა ზაზა გახელაძე 2020 წლის 11 ივლისს დაჭრეს და დააკავეს. ოკუპირებული ცხინვალის ე.წ.-მა სასამართლომ, ზაზა გახელაძეს 12 წლითა და 6 თვით უკანონო პატიმრობა მიუსაჯა. მას ბრალდება რუსეთის ფედერაციის სისხლის სამართლის კოდექსის ორი მუხლით ედავებოდა: 317-ე მუხლით, რომელიც სამხედრო მოსამსახურის სიცოცხლის ხელყოფის მცდელობად კვალიფიცირდება და 322-ე მუხლით, რაც „სახელმწიფო საზღვრის უკანონოდ გადაკვეთას“ გულისხმობს.

ლაშა დარსალია ჟენევაში საერთაშორისო დისკუსიების 53-ე რაუნდის ფარგლებში იმყოფება.

ჟენევის საერთაშორისო მოლაპარაკებების ფორმატი 2008 წლის აგვისტოს ომის შემდეგ, ცეცხლის შეწყვეტის შეთანხმების შესაბამისად, საქართველოსა და რუსეთს შორის შეიქმნა. ეს არის ერთადერთი ფორმატი, სადაც რუსეთი და საქართველო პარტნიორებთან ერთად საუბრობენ.