პარლამენტი უზენაესი სასამართლოს მოსამართლეობის კანდიდატების მოსმენას მომავალ კვირას დაიწყებს. ოპოზიცია პროცესში ჩართვაზე კვლავ უარს ამბობს

საქართველოს საკანონმდებლო ორგანო უზენაესი სასამართლოს მოსამართლეობის კანდიდატების მოსმენას მომავალ კვირას დაიწყებს. ამ ეტაპზე, ცნობილია, რომ ოპოზიცია პროცესში მონაწილეობაზე უარს ამბობს.

მათი თქმით, აუცილებელია, რომ ჯერ იუსტიციის უმაღლესი საბჭოს რეფორმა ჩატარდეს.

„აშშ-ის ელჩმა, მედიატორებმა, არაერთხელ განაცხადეს და ყვითლად გაუხაზეს „ქართულ ოცნებას“, რომ შარლ მიშელის დოკუმენტის ეს ნაწილი შესასრულებელი აქვს. იქ გარკვევით წერია, რომ ჯერ არის პროცესის დაპაუზება, შეჩერება, ცვილილებების განხორციელება და შემდეგ - ახალი წესის შესაბამისად, მოსამართლეების დანიშვნა. ბოლო კონსულტაციაზე, რომელიც „ლელოსთან“ და სხვა პარტნიორებთან გვქონდა, გადავწყვიტეთ, რომ თუ „ქართული ოცნება“ ასე ხისტად უგულებელყოფს შარლ მიშელის დოკუმენტს, მედიატორების მითითებას, მაშინ, ჩვენ ამ პროცესში მონაწილეობას ვერ მივიღებთ. ეს არის ფაქტი და რეალობა“, - აცხადებს „სტრატეგია აღმაშენებლის“ წევრი, პაატა მანჯგალაძე.

მის პოზიციას იზიარებენ „გირჩშიც“.

„ამ პროცესის რამდენიმეკვირიანი გადავადება, ვიდრე ჩვენ ჩავატარებდით სათანადო რეფორმებს, პრინციპულად არაფერს არ დააშავებდა. ამიტომ, ჩემთვის, ცოტა გაუგებარია, რატომ ჩქარობენ. უფრო მარტივი იქნება, რომ ეს პროცესი ცოტა გადავდოთ, მივიღოთ ყველა მისაღები ცვლილება და ამის შედეგ გადავიდეთ მოსამართლეების დანიშვნაზე. კიდევ უფრო უკეთესი იქნება, თუ ჩვენ, „ქართულ ოცნებასთან“ და სხვა ოპოზიციურ პარტიებთან ერთად, სასამართლო სისტემის ფუნდამენტურ რეფორმაზე დავფიქრდებით, რათა ეს პრობლემა აღარ გვქონდეს. ვერც შარლ მიშელის დოკუმენტი და ვერც მიმდინარე პროცესები, პრინციპულად ვერ გამოასწორებს სისტემაში არსებულ პრობლემებს“, - ამბობს სანდრო რაქვიაშვილი.

„ლელო საქართველოსთვის“ ერთ-ერთი ლიდერი, მამუკა ხაზარაძე აცხადებს, რომ მისი პარტიაც უარს ამბობს მოსამართლეთა მოსმენაში მონაწილეობაზე.

„ჩვენ არ მივიღებთ მოსამართლეების მოსმენაში მონაწილეობას და ყველაფერს გავაკეთებთ იმისთვის, რომ შარლ მიშელის დოკუმენტი აღსრულდეს. თქვენ იცით, რომ ამ დოკუმენტში ძალიან ნათლადაა დაფიქსირებული, რომ მოსამართლეების შერჩევა უნდა შეჩერდეს, ვიდრე კანონმდებლობა არ იქნება მიღებული. ერთხელ და სამუდამოდ, საქართველოში უნდა შეიქმნას სივრცე, რომელშიც გამორიცხული იქნება მიკერძოება და ისეთი მოსამართლეების არსებობა, როგორებიც დღეს კლანის სახით გვევლინებიან“, - აცხადებს მამუკა ხაზარაძე.