ირაკლი ღარიბაშვილი: დღეს დაანონსებული მარშის ჩატარება მიზანშეუწონლად მიმაჩნია, რადგან სამოქალაქო დაპირისპირების საფრთხეს შეიცავს

„დღეს დაანონსებული მარშის ჩატარება მიზანშეუწონლად მიმაჩნია. დღევანდელი აქცია სამოქალაქო დაპირისპირების საფრთხეს შეიცავს. მოგეხსნებათ, რომ მოსახლეობის უმრავლესობისთვის, აღნიშნული აქციის ჩატარება არის მიუღებელი. შესაბამისად, მე მიმაჩნია, რომ ეს აქცია არ უნდა ჩატარდეს რუსთაველის გამზირზე“, - ამის შესახებ საქართველოს პრემიერ-მინისტრმა, ირაკლი ღარიბაშვილმა მთავრობის სხდომაზე განაცხადა.

მისივე თქმით, შინაგან საქმეთა სამინისტრო არის მუდმივ კონტაქტზე „პრაიდის“ ორგანიზატორებთან.

„მათ განემარტათ, რომ მათ მიერ დაანონსებული აქცია შეიცავს გარკვეულ საფრთხეს. შესაბამისად, მათ მიეცათ ალტერნატიული ლოკაციების შერჩევის შესაძლებლობა. მინდა, მივმართო მათ, რომ გაითვალისწინონ ჩვენი მოწოდება. კერძოდ, პოლიციის მიერ შეფასებული რისკები, საფრთხეების შეფასება მიიღონ მხედველობაში და ალტერნატივად, სხვა ლოკაცია აირჩიონ. ვფიქრობ, ასეთი ტიპის აქციები და ღონისძიებები ხელს უწყობს ამ უმცირესობების წარმომადგენლების დისკრიმინაციას. როდესაც ზედმეტად ხდება აპელირება და ხაზგასმა მათ განსხვავებულობაზე, მიმაჩნია, რომ სწორედ ესაა ამ ადამიანების დისკრიმინაცია. რა თქმა უნდა, ჩვენს მოსახლეობას არავისთან არ აქვს პრობლემა, არც ამ ადამიანებთან. ყოველდღე, ეს ადამიანები, უმცირესობების წარმომადგენლები, მუშაობენ და ცხოვრობენ აბსოლუტურად ნორმალურ ვითარებასა და რეჟიმში. მათ არავითარი საფრთხე არ ექმნებათ ჩვენს ქვეყანაში. აღნიშნული დისკრიმინაციის არცერთი ფაქტი არ არსებობს და თუ ოდესმე ცალკეული შემთხვევა დაფიქსირებულა, რა თქმა უნდა, ამის განზოგადება არ შეიძლება. დღეს, ამ აქციის მოწინააღმდეგეთა მრავალრიცხოვანი აქციაა დაგეგმილი. რა თქმა უნდა, ესეც მათი კონსტიტუციური უფლებაა და ყველაფერი უნდა ჩატარდეს კონსტიტუციისა და კანონის ფარგლებში. პროტესტის ფორმა უნდა იყოს მშვიდობიანი და არ უნდა შეიცავდეს ძალადობის რაიმე ნიშნებს. ქვეყანაში უნდა იყოს წესრიგი და კანონის უზენაესობა. მე, როგორც პრემიერ-მინისტრი და მთავრობის მეთაური, რა თქმა უნდა, არ დავუშვებ არავითარ ქაოსსა და სამოქალაქო დაპირისპირებას. შესაბამისად, ყველაფერს გავაკეთებთ იმისთვის, რომ მაქსიმალურად შევამციროთ რისკები და დღევანდელი დღე ძალიან მშვიდად ჩავატაროთ. ყველას კარგად უნდა გვესმოდეს, რომ ეს საქართველოა, ჩვენ გვაქვს ჩვენი ტრადიციები და წესები, რომელთაც ყველამ პატივი უნდა სცეს - რა თქმა უნდა, ჩვენი კონსტიტუციისა და კანონის ფარგლებში. სამწუხაროდ, დღევანდელი აქციის ორგანიზატორების უკან ისევ რევანშისტული, რადიკალური ჯგუფები დგანან. კერძოდ, რადიკალური ოპოზიცია სააკაშვილის მეთაურობით. სრული პასუხისმგებლობით ვაცხადებ, რომ ისინი უკეთებენ ორგანიზებას აღნიშნულ მარშსა და ამ აქციებს. რა თქმა უნდა, სწორედ მათი მიზანია დღეს ჩვენს ქვეყანაში სამოქალაქო არეულობისა და ქაოსის შემოტანა. ცხადია, ჩვენ ამას არ დავუშვებთ. ჩვენს ქვეყანაში ყველაფერი იქნება ისე, როგორც ჩვენს ხალხსა და მოსახლეობას სურს“, - განაცხადა ირაკლი ღარიბაშვილმა.

„თბილისი პრაიდმა“ დღეს დაგეგმილ ღირსების მარშთან დაკავშირებით განცხადება გაავრცელა. როგორც მასში წერია, საორგანიზაციო გუნდი მუშაობს უსაფრთხოებასთან დაკავშირებულ საკითხებზე და საბოლოოდ შეთანხმებულ გეგმას დღის პირველ ნახევარში გააჟღერებენ.

დღესვე, საქართველოს საპატრიარქოს მოწოდებით, მოქალაქეთა ნაწილი, ქაშუეთის ეკლესიასთან შეიკრიბება.

„5 ივლისს, 17 საათზე, შევიკრიბოთ ქაშუეთის წმინდა გიორგის ტაძართან, აღვავლინოთ ყოვლადწმინდა ღვთისმშობლის პარაკლისი და მსოფლიოს ვაჩვენოთ, რომ ჩვენ ჩვენს ღირსებას ვიცავთ და გადაგვარების თავსმოხვეული მცდელობა ჩვენთვის მიუღებელია“, - აღნიშნულია საპატრიარქოს განცხადებაში“, - აღნიშნულია საპატრიარქოს მიერ 3 ივლისს გავრცელებულ განცხადებაში.

ამასთან, საპატრიარქო მიმართავს მოსახლეობას, მშვიდობიანად დააფიქსირონ პროტესტი და „არ აჰყვნენ ძალადობრივი კონფრონტაციისათვის მიზანმიმართულ პროვოკაციას“.