ნინო ლომჯარია: პრეზიდენტი იყო ერთ-ერთი პოლიტიკოსი ხელისუფლებიდან, რომელმაც, მეტ-ნაკლებად, სწორი და ადეკვატური შეფასებები გააკეთა როგორც 5 ივლისის წინა დღეებში, ისე - ამ დღესთან დაკავშირებულ მოვლენებზე

„მიმაჩნია, რომ პრეზიდენტი იყო ერთ-ერთი პოლიტიკოსი ხელისუფლებიდან, რომელმაც მეტ-ნაკლებად, სწორი და ადეკვატური შეფასებები გააკეთა როგორც 5 ივლისის წინა დღეებში, ისე - ამ დღესთან დაკავშირებულ მოვლენებზე. მინდა, მოვისმინო, რას ფიქრობს დღეს ის, თუნდაც, იმ განცხადებებთან დაკავშირებით, რომელთაც მთავრობის მეთაური აკეთებს“, - ამის შესახებ საქართველო სახალხო დამცველმა, ნინო ლომჯარიამ პრეზიდენტთან შეხვედრის დაწყებამდე, მედიასთან განაცხადა.

მისი თქმით, გეგმავს, სალომე ზურაბიშვილს საკუთარი მოსაზრებებიც გააცნოს.

„ვაპირებ, ვუთხრა პრეზიდენტს, თუ რატომ მიმაჩნია, რომ არასწორია, დღემდე გამოძიება რომ არ დაწყებულა ძალადობრივი ჯგუფური ქმედებების ორგანიზატორების მიმართ, რომ ყველა მტკიცებულება მიუთითებს იმაზე, რომ შინაგან საქმეთა სამინისტრო და პროკურატურა უნდა დაინტერესდნენ და დაიწყონ გამოძიება, დევნა და პასუხისგებაში მისცენ ამ ძალადობრივი ქმედებების იდეოლოგები და ორგანიზატორები. რაც შეეხება ლექსო ლაშქარავას საქმეზე დაწყებულ გამოძიებას; რა თქმა უნდა, ჩვენ თვალს მივადევნებთ. ასევე, ვემზადებით იმისთვის, რომ ჩატარებული ექსპერტიზის შეფასებაშიც ჩავრთოთ ჩვენი ექსპერტები და წარმომადგენლები“, - განაცხადა ნინო ლომჯარიამ.

აგრესიული ჯგუფები მედიის წარმომადგენლებს ფიზიკურად გაუსწორდნენ. დაკავებულია 20-ზე მეტი თავდამსხმელი.