აგრესიული ჯგუფები მედიის წარმომადგენლებს ფიზიკურად გაუსწორდნენ

„თბილისი პრაიდის“ მოწინააღმდეგეების აგრესიისა და თავდასხმის სამიზნე დღეს ოპერატორები და ჟურნალისტები გახდნენ. ისინი ფიზიკურად გაუსწორდნენ მედიის წარმომადგენლებს, მათ შორის - ქრონიკის თანამშრომლებს. „პრაიდის“ მოწინააღმდეგეებმა ჟურნალისტ დიმიტრი ყირიმლიშვილსა და ოპერატორს შოთა კერვალიშვილს, პროფესიული მოვალეობის შესრულების დროს, სიტყვიერი შეურაცხყოფა მიაყენეს, შემდეგ კი, მძიმე საგნებით, ფიზიკურად გაუსწორდნენ. საჭირო გახდა სასწრაფო დახმარების გამოძახება.

„ქრონიკის“ გადამღები ჯგუფის გარდა, აგრესიული ადამიანები ასევე ფიზიკურად გაუსწორდნენ სხვა მედიასაშუალებების წარმომადგენლებსაც. მათ დააზიანეს ტელევიზიების კუთვნილი ტექნიკაც.

„დავინახე, როგორ უსწორდებოდნენ ჩემს ოპერატორს ფიზიკურად, უშუალოდ სამსახურებრივი მოვალეობის შესრულების დროს. როცა გადავწყვიტე, რომ მისთვის გამეწია დახმარება ან მეკითხა, რატომ გვისწორდებოდნენ, მოგვაყენეს ფიზიკური შეურაცხყოფა. ჩაგვარტყეს ხელკეტები, ქვები და გაგვისწორდნენ ფიზიკურად. მოგვიწია გამოქცევა“, - ამბობს დიტო ყირიმლიშვილი.

მედიაზე თავდასხმის შედეგად, მედიის კიდევ ერთი წარმომადგენელი დაშავდა - „ტვ პირველის“ ოპერატორი.

„სირცხვილიას“ ოფისთან ჩამოვდიოდით, რა დროსაც, ბრბო ამოვიდა. ვასრულებდით ჩვენს მოვალეობას მე და ჩემი ჟურნალისტი. ჯერ მირანდას სწვდნენ თმებში, ითრიეს, მერე, მთელი აგრესია ჩემზე გადმოვიდა. არავის უთქვამს, რატომ? რისთვის? რა ხდებოდა? უბრალოდ, წამოვიდა გინება და დაშენა“, - ამბობს „ტვ პირველის“ ოპერატორი.

თავდასხმის სამიზნე გახდა ტელეკომპანია „მთავარის“ ჯგუფიც.

„დამრჩა შთაბეჭდილება, რომ მათი ერთადერთი მიზანი ჩვენი საქმიანობისთვის ხელის შეშლა და ამის ძალადობრივი მეთოდებით გაკეთება იყო. როდესაც პირდაპირ ეთერში ვიყავი, არც კი უკითხავთ რამე, კომუნიკაციაში არც კი შემოსულან, პირდაპირ გადმოვიდნენ ანგარიშსწორებაზე, პირდაპირ ცდილობდნენ, რომ გარშემო ყველა ეცემათ, ყველას რაღაც ფიზიკური დაზიანება მიეღო. მათ არც პოლიცია აინტერესებდათ“, - ამბობს „მთავარის“ ჟურნალისტი, დეა მამისეიშვილი.