რას ამბობენ მედიის წარმომადგენლები, რომელთაც აგრესიულად განწყოფილი ჯგუფები დაესხნენ თავს

„თბილისი პრაიდის“ მოწინააღმდეგეთა აქციაზე დაშავებულების მდგომარეობა სტაბილურია. ამ დროისთვის, საავადმყოფოში სამი ადამიანი რჩება. მედიასაშუალებების წარმომადგენლებზე ფიზიკური ძალადობისა და ძალადობის მუქარით პროფესიულ საქმიანობაში უკანონოდ ხელის შეშლის ფაქტზე, შინაგან საქმეთა სამინისტრომ სამი ადამიანი დააკავა. ამ წუთებში მედიის წარმომადგენელთა გამოკითხვა მიმდინარეობს. დაკავებულთაგან სამი წარსულში ნასამართლევია.

„ცხვირი მქონდა გატეხილი, თვალი - დაზიანებული და ტუჩი გამიკერეს. გუშინ, კამერას ჩაარტყეს დროშა. როცა მივხვდი, რომ ძალიან აგრესიულები იყვნენ და აღარ ღირდა იქ გაჩერება, ვცდილობდი, წამოვსულიყავი. მაგ მომენტში, ძალიან ძლიერად მომხვდა ცხვირში, არ ვიცი, მუშტი იყო, ჯოხი თუ რამე სხვა. გონება არ დამიკარგავს და ყველანაირად შევეცადე, რომ გავცლოდი. როცა გავრბოდი, რამდენიმე ადამიანი მირტყამდა. არ ვიცი, რამდენი იყვნენ“, - ამბობს „პალიტრანიუსის“ ოპერატორი რომან ტარუღიშვილი.

აგრესიული ჯგუფების თავდასხმას იხსენებს „ფორმულას“ ჟურნალისტიც.

„პოლიციის განსაკუთრებული მობილიზაციის დროს იძალადეს ჩემზე და ჩემს ოპერატორზე. მას უმძიმესი დაზიანებები აქვს მიყენებული და არის სასტიკად ნაცემი. დღეს დამირეკეს, რომ თბილისის პოლიციის დეპარტამენტმა გადაიბარა ჩვენი და ჟურნალისტების საქმეების ნაწილი. ჩვენს უფლებებს იცავს საქართველოს ახალგაზრდა იურისტთა ასოციაცია და ადვოკატთან ერთად ვაპირებ გამოკითხვაზე შესვლას. რა თქმა უნდა, დეტალურად მოვყვები, თუ როგორ განვითარდა ძალადობრივი მოვლენები. ეს იყო უმძიმესი და დეტალურად გვახსოვს. ჩვენმა კადრებმა დააფიქსირა, მათ შორის, ის პირები, რომლებიც ძალადობდნენ“, - აღნიშნა „ფორმულას“ ჟურნალისტმა, გუგა დვალიშვილმა.

დაზარალებულის სტატუსი უკვე მიენიჭა ოპერატორ ზურა მანაგაძეს.

„გვიანობამდე მიდიოდა ჩემი დაკითხვა. დღეს დამიბარეს და მომანიჭეს დაზარალებულის სტატუსი. ვიღებდი ოპერატორის ცემას. უცბად, მარცხენა მხრიდან, ვიღაც გაურკვეველი პირი გამოხტა, დამარტყა და დამაგდო, კადრშია აღნიშნული. ფიზიკურად არ დამინახავს. დაცემის შემდეგ, განვაგრძე გადაღება. ის პიროვნება გაქრა, იქ ვეღარ ვნახე“, - ამბობს „რუსთავი 2“-ის ოპერატორი, ზურა მანაგაძე.

დღეს მიანიჭებენ დაზარალებულის სტატუსს მედიის კიდევ ერთ წარმომადგენელს, გუგა მაისურაძეს.

„გუშინ ვიყავი გამოკითხვაზე. ჩემთან დაკავშირებით, სამ ეპიზოდზე მიმდინარეობს გამოძიება. ორჯერ მუშტისა და ერთხელ - წიხლის დარტყმის ეპიზოდებზე. დღეს უნდა მომანიჭონ დაზარალებულის სტატუსი. გამოძიება 126-ე მუხლით მიმდინარეობს. მაქვს კითხვები, რომელთაც დავსვამ და იმედია, მათ პასუხი გაეცემა“, - აღნიშნა „ტვ პირველის“ ჟურნალისტმა, გუგა მაისურაძემ.

აგრესიულად განწყოფილი ჯგუფები გუშინ ფიზიკურად გაუსწორდნენ არაერთი მედიასაშუალების, მათ შორის, „იმედის“ თანამშრომლებს. სულ, მედიის 53 წარმომადგენელი დაშავდა. ამასთან, „თბილისი პრაიდის“ მოწინააღმდეგეები „პრაიდის“ ორგანიზატორების ოფისში შეიჭრნენ, დაიკავეს აივანი, ჩამოხსნეს ლგბტ თემის შვიდფერიანი დროშა და საქართველოს დროშა აღმართეს. მოგვიანებით, „სირცხვილიას“ ოფისს ბოთლები და სამშენებლო ფილები დაუშინეს.