ალეკო ელისაშვილი: იმ ცირკის ნაცვლად, რომელიც იხილა მთელმა ქვეყანამ, უკეთესი იქნებოდა, ღარიბაშვილისა და გომელაურისთვის მოგვესმინა

პარტია „მოქალაქეები“ ვართ დამოუკიდებელი ოპოზიციური ძალა და ამ ეტაპზე არ მიგვაჩნია, რომ პარლამენტი უნდა დავტოვოთ და ქუჩაში გადავინაცვლოთ, - ამის შესახებ „ქრონიკის“ ეთერში ალეკო ელისაშვილმა განაცხადა. მან ასევე აღნიშნა, რომ მნიშვნელოვანი იყო დეპუტატებს არსებულ კითხვებზე დღეს პრემიერ-მინისტრისა და შს მინისტრისგან მოესმინათ პასუხები.

„რამდენადაც ვიცი, ასეთი აზრი იყო „ქართულ ოცნებაში“, რომ მოსულიყვნენ პრემიერ-მინისტრი და შინაგან საქმეთა მინისტრი. ჩემი აზრით, უნდა მოსულიყვნენ და იმ ცირკის ნაცვლად, რომელიც იხილა მთელმა ქვეყანამ, ღარიბაშვილისა და გომელაურისთვის რომ მოგვესმინა, იქნებოდა უკეთესი. მე მაქვს მთავარი კითხვა, რომელიც წესით ყველა ნორმალურ ადამიანს უნდა ჰქონდეს - ლექსო ლაშქარავას გარდაცვალება გამოწვეული იყო თუ არა 5 ივლისს მიღებული დაზიანებებით, ეს ერთი. ასევე, რა გახდა რეალურად მისი გარდაცვალების მიზეზი. არის თუ არა ხელისუფლება მზად იმისთვის, რომ სანდო გახდეს ეს პასუხები, ჩაერთონ უცხოელი ექსპერტები გამოძიებაში და ასევე გრძნობს თუ არა ღარიბაშვილი იმას, რომ მან ერთგვარად, თვალის ჩაპაჭუნებით წაახალისა ძალადობა 5 ივლისს ან გრძნობს თუ არა პასუხისმგებლობას ბატონი გომელაური, როდესაც მან და მისმა უწყებამ ვერაფერი იღონა 5 ივლისს ამ დარბევების დროს. მე ვთვლი, რომ ყველა ნორმალურ ადამიანს ეს კითხვები უნდა ჰქონდეს და ამ კითხვებზე უნდა მოგვესმინა პასუხები მთავარი ადრესატებისგან“, - აღნიშნა ელისაშვილმა.