გიორგი ცუცქირიძე: ლოკაციის შეცვლაც და მიტინგის ოცნების ოფისთან გადატანაც, სადაც გაცილებით მცირე სივრცეა, რათა მასის ეფექტი მაინც შექმნან, ელექტორალური დანაკლისის შეფუთვას ემსახურება

„ლოკაციის შეცვლაც და მიტინგის ოცნების ოფისთან გადატანაც, სადაც გაცილებით მცირე სივრცეა, რათა მასის ეფექტი მაინც შექმნან ამ ელექტორალური დანაკლისის შეფუთვას ემსახურება. ლოკაციის შეცვლა, ოცნების ოფისზე შტურმის და არეულობის მოსაწყობად, მინავლული საპროტესტო მუხტის აწევასაც ემსახურება, წინა მცდელობებს თუ გავიხსენებთ“, - წერს ექსპერტი გიორგი ცუცქირიძე „ფეისბუქის“ გვერდზე.

მისი თქმით, უკვე მერამდენედ, მიხეილ სააკაშვილის პროგნოზიც რეალობას ასცდა და ეს პროტესტი ქრება. „მას შემდეგ, რაც ჟურნალისტთა პროტესტი, მთლიანად პოლიტიკურ მდგენელში გადავიდა, ხოლო პარლამენტში „ნაცოპოზიციის“ მხრიდან მორიგი ისტერიული შოუ ვიხილეთ, უკვე ცხადი იყო, რომ საპროტესტო მუხტი მკვეთრად დაეცემოდა. პროტესტში პოლიტიკური პარტიების და ნაციონალების ჩართვით, ბევრი პროტესტანტისათვის ვინც გუშინ ძალადობას აპროტესტებდა, ცხადი გახდა ამ პროტესტის ნამდვილი მიზანი. არეულობის ინსპირირება და პოლიტიკური კრიზისის შექმნა ხელისუფლების ჩამოშლის და „ნაციონალების“ დაბრუნების მიზნით. ამიტომაც იყო, რომ დღეს გუშინდელზე გაცილებით ნაკლები ხალხი მიუვიდათ. ხალხს უნდა უკეთესი მომავალი და ხვალინდელი დღის პერსპექტივა და არა არაფრის მომცემი კლოუნადა, მით უმეტეს რევანშზე დაგეშილი პოლიტიკოსების ხილვა ხელისუფლებაში.

ლოკაციის შეცვლაც და მიტინგის „ოცნების“ ოფისთან გადატანაც, სადაც გაცილებით მცირე სივრცეა, რათა მასის ეფექტი მაინც შექმნან ამ ელექტორალური დანაკლისის შეფუთვას ემსახურება. ლოკაციის შეცვლა, „ოცნების“ ოფისზე შტურმის და არეულობის მოსაწყობად, მინავლული საპროტესტო მუხტის აწევასაც ემსახურება, წინა მცდელობებს თუ გავიხსენებთ. უკვე მერამდენედ ასცდა რეალობას მიხეილ სააკაშვილის პროგნოზიც და შარშანდელი თოვლის გუნდივით ოცნების მაგივრად, თავად ეს პროტესტი ქრება“, - წერს გიორგი ცუცქირიძე.

პარლამენტიდან საპროტესტო აქციამ „ქართული ოცნების“ ოფისთან გადაინაცვლა.

დღის განმავლობაში, ვითარება რამდენჯერმე დაიძაბა ჯერ პარლამენტის უკანა შესასვლელთან, შემდეგ კი - უშუალოდ შენობაში. ჟურნალისტების ნაწილი შენობაში შესვლას ცდილობდა და აცხადებდა, რომ საშვის მიუხედავად, მათ საკანონმდებლო ორგანოში არ უშვებდნენ. მას შემდეგ, რაც მთავრობისთვის მიცემული ულტიმატუმის ვადა 12:00 საათზე ამოიწურა, მედიისა და სამოქალაქო ორგანიზაციების წარმომადგენლები, „ნაციონალურ მოძრაობასთან“ ერთად, საკანონმდებლო ორგანოში შეიჭრნენ და პარლამენტის თავმჯდომარის ტრიბუნა დაიკავეს. ისინი აცხადებდნენ, რომ ტრიბუნას იქამდე არ გაათავისუფლებდნენ, ვიდრე პრემიერი არ გადადგებოდა.

ერთმანეთს დაუპირისპირდნენ დეპუტატებიც. სიტუაციის განმუხტვას მანდატურის სამსახური ცდილობდა.

მოგვიანებით, ოპოზიციის წარმომადგენლებს პარლამენტის თავმჯდომარისთვის განკუთვნილი ტრიბუნა გაათავისუფლებინეს და რიგგარეშე სხდომა დაიწყო. თუმცა, არც ამის შემდეგ წარმართულა სხდომა მშვიდ გარემოში: ფრაქცია „ლელო - პარტნიორობა საქართველოსთვის“ წევრებმა პარლამენტის სხდომათა დარბაზი, დემონსტრაციულად, მას შემდეგ დატოვეს, რაც საკანონმდებლო ორგანოს თავმჯდომარემ მიუთითა, რომ კითხვები მხოლოდ პროცედურულ საკითხებზე დაესვათ და არ გამოეყენებინათ კითხვისთვის განკუთვნილი დრო პოლიტიკური განცხადებებისთვის.