ბადრი ჯაფარიძე: პრეზიდენტი მიშელი გააგრძელებს პროცესში ჩართულობას, რათა შეთანხმება, რომელსაც ჰქვია საქართველოს მომავლის საგზაო რუკა, განხორციელდეს

პრეზიდენტი მიშელი გააგრძელებს ჩართულობას ამ პროცესში, რათა შეთანხმება, რომელსაც ჰქვია საქართველოს მომავლის საგზაო რუკა, განხორციელდეს, - განაცხადა „ლელო საქართველოსთვის“ ლიდერმა, ბადრი ჯაფარიძემ.

მან ევროპული საბჭოს პრეზიდენტთან შეხვედრა შეაფასა და და აღნიშნა, რომ ევროკავშირი გააგრძელებს მხარდაჭერას და ყველა იმ ნაბიჯს განახორციელებს, რომელიც ჩვენს ქვეყანას სჭირდება.

„პრეზიდენტ მიშელთან ძალიან შინაარსიანი, კარგი და კონსტრუქციული შეხვედრა გვქონდა. კიდევ ერთხელ ჩვენი უახლოესი და უმნიშვნელოვანესი სტრატეგიული პარტნიორის, უმაღლესმა თანამდებობის პირმა დაადასტურა ჩვენი ქვეყნის, ჩვენი ხალხის უპირობო მხარდაჭერა და ის, რომ ევროკავშირი გააგრძელებს მხარდაჭერას და ყველა იმ ნაბიჯს განახორციელებს, რომელიც ჩვენს ქვეყანას სჭირდება ამ უმწვავესი რეგიონული გამოწვევების ფონზე. ამავდროულად, ჩვენ გვქონდა სიღრმისეული ანალიზის გაკეთების შესაძლებლობა.

რაც შეეხება პრეზიდენტ მიშელის მედიაციით მიღწეულ შეთანხმებასა და მის შესრულების პროცესს, იყო აბსოლუტურად ღიად დემონსტრირებული როგორც არღვევს „ქართული ოცნება“ შეთანხმებას უზენაესის სასამართლოს მოსამართლეების დანიშვნის ნაწილში; ასევე, რომ უმნიშვნელოვანესი გადაწყვეტილებები იქნა გადადებული. ეს არის იუსტიციის უმაღლესი საბჭოს არამოსამართლე წევრების დანიშვნა; გარკვეული პერიოდით გადადებულია საკონსტიტუციო ცვლილებები; ასევე გადაიდო ძალაუფლების განაწილების შესახებ შეთანხმების მუხლის იმპლემენტაცია, ასე, რომ გვქონდა ძალიან კარგი კონსტრუქციული საუბარი.

პრეზიდენტი მიშელი გააგრძელებს ჩართულობას ამ პროცესში, რათა შეთანხმება, რომელსაც ჰქვია საქართველოს მომავლის საგზაო რუკა განხორციელდეს. ეს სჭირდება ჩვენს ხალხს, ჩვენს ქვეყანას და რაც მთავარია, რეგიონული გამოწვევების ფონზე, ეს ხაზგასმით ითქვა, ამ შეთანხმების განხორციელება არის აუცილებელი და სასიცოცხლოდ მნიშვნელოვანი“, - განაცხადა ჯაფარიძემ.

შარლ მიშელთან შეხვედრას 19 აპრილის შეთანხმების ხელმომწერ პარტიებთან ერთად, „ნაციონალური მოძრაობაც“ დაესწრო. აღსანიშნავია, რომ მიხეილ სააკაშვილის გუნდი ამ დრომდე არ გახდა შარლ მიშელის მედიაციით შექმნილი შეთანხმების ნაწილი.

შარლ მიშელს ოპოზიციონერებთან ჰქონდა შეხვედრა. ევროპული საბჭოს პრეზიდენტი საქართველოს 18 ივლისს ეწვია. დღეს ის ბათუმის მე-17 ყოველწლიურ საერთაშორისო კონფერენციაში მიიღებს მონაწილეობას. კონფერენციის ცენტრალური საკითხი ევროკავშირის სამ ასოცირებულ პარტნიორს – საქართველოს, მოლდოვასა და უკრაინას შორის გაღრმავებული თანამშრომლობა იქნება, რომლებმაც, ცოტა ხნის წინ, ასოცირებული სამეულის ფორმატი შექმნეს.

გარდა საქართველოს პრეზიდენტისა და პრემიერ-მინისტრისა, ის ბათუმში მოლდოვის რესპუბლიკის პრეზიდენტს, მაია სანდუსა და უკრაინის პრეზიდენტს, ვოლოდიმირ ზელენსკისაც შეხვდება.

ბათუმის მე-17 საერთაშორისო კონფერენციის პანელის წევრები ფიზიკურად დაესწრებიან, ხოლო აუდიტორია ვირტუალურად შეძლებს ღონისძიებაში მონაწილეობას. კონფერენციის მონაწილეთა სია იხილეთ ამ ბმულზე.